Debasho el titolo “The Hassidic Vicar of Baghdad”, la gazeta İsraelyana Haaretz eskrivyo la semana pasada ke el byen konosido Vikaryo “Canon Andrew White” leader de la komunidad Anglikana de Baghdad, selebre por sus kudyos en favor de sus “fideles”, no se limita solo a akudir los kristyanos ke se topan en estado de peligro o prekaridad, ma ke el tambyen proteja los ultimos djudyos ke kedaron en la Kapitala İrakyana despues 2600 anyos de estadia en este Payis.
Durante uno de sus sedjornos en Londra, invitado de la parte de la komunidad djudia a avlar en la “Maida Vale Synagogue de la kapitala Ingleza” yena de todos los ke avian en el pasado imigrado, el Prelato disho en riendo: “I have never been in the same room with so many Iraqi Jews before,” (asta agora no me tengo nunka topado en un mizmo lugar kon tantos djudyos irakyanos).
La lektura kompleta del artikolo syendo rezervada a los abonados del Haaretz, mis informasyones a este sujeto se limitan a estos chikos detalyos ke paresyeron en la publikasyon elektronika de la gazeta.
Todo en no syendo kompleta, esta informasyon izo soplar komo un chiko ayre de esperansa en mi vizyon aktualmente pesimista del mundo kaotiko ande bivimos i ande los konseptos de (h)umanidad paresen munchas vezes ser absentes.
A una epoka ande tenemos la sensasyon lansinante de la instabilidad sosyal ke mos entorna i de la insertidumbre de lo ke son las aktualas valores prevalyentes, el solo fakto de meldar ke “un prelato Kristyano kargado de la seguridad de su propya komunidad en un espasyo jeografiko partikularmente peligrozo, se karga tambyen voluntaryamente de un grupo de personas ke no partajan sus kreensas relijyozas” me parese ser komo un rayo de luz en las tinyevlas ande se esta undyendo la (h)umanidad.
İvo Molinas, prezidente del konsilyo de administrasyon del Şalom avlo en su editoryal de la semana pasada de “Godot”, el Godot de Samuel Becket ke se aspera i aspera i no vyene.
En efekto, el nunka vyendra.... i si keremos ke kualkyer koza sea absolutamente realizada, es unikamente a mozotros ke inkumbe de azer el primer esforso, kon muestro solo potensyal de aktividad, malorozamente terrivlemente limitado.
El Vikaryo anglikano mos ambeza ke el solo ovligo para la persona, ken ke sea, es de azer kon sinseridad todo lo ke su konsyensya de “kriansa pensante” le demanda de azer. Por seguro ke la vida, kon su rikeza i su varyedad, mos prokurara diferentes okazyones de dever azerlo...
A este propozito, me akodro aver meldado ke Sokrates, unos kuantos dias antes de bever el tosigo nombrado “cigue”, (kastigo ke le fue inflijido por aver dezovedesido a la ley) avia empesado a ambezarse a tanyer un muevo instrumento de muzika; entonses uno de sus disiplos le demando “porke ambezarte a tanyer este instrumento djusto antes de murir?”; La repuesta del grande filozofo grego fue: “simplemente para no murir sin saver tanyerlo”.
No... “Godot no va venir”, ma en kada uno de entre mozotros ay dos fuersas nombradas “voluntad” i “dinyidad”.
