El diya de los padres es una selebrasion ke empeso en los Estados Unidos para kompletar el diya de las madres.
Este diya fue fondado en Spokane, Washington, por Sonora Smart Dodd, en el anyo 1910. Su padre, un veterano de la gerra sivil, engrandesio a sus sesh ijos solo, duspues de la muerte de su mujer. Dodd propozo de selebrar este diya en el 5 de Juno, ke era el diya del aniversario de su padre. Ma komo no tuvieron bastante tiempo por las preparasiones, desidaron de selebrarlo el treser alhad del mez Juno.
En el empesijo, el diya de los padres no izo muncho sukse. En el anyo 1920, Dodd areto las selebrasiones porke estava estudiando en la Instituo de Artes en Chicago. En el anyo 1930, Dodd torno atras a Spokane Washington, i kontinuo a lavorar para pueder reushir a kitar una ley, i azer el diya de los padres un diya nasional. Los grupos komersiales (ke kerian profitar de este diya en vendiendo regalos para los padres), el Konsul del Diya de los Padres (ke fue fondado por los komersantes de New York) la ayudaron a kitar esta ley.
Los amerikanos no kijeron akseptar ke este diya seyga una fiesta porke ya savian la entision de los komersantes: eyos kerian profitar de este diya komo se profita del diya de las madres. Las gazetas kontinuaron a eskrivir artikolos atakando los komersantes, i burlandosen de eyos.
En el anyo 1972, el prezidente Nixon afirmo la ley del diya de los padres, i este diya se izo una fiesta nasional.
En el anyo 1980, el Konsejo del Diya de los Padres eskrivio ke este diya se izo un segundo Noel por las endustrias orientadas a vistimientas, i a regalos por los padres.
Vineremos agora al padre judio. El padre judio no tiene tanta otoridad ke la madre judia en la famiya. La madre judia es mas fuerte, mas atemada enriva de los ijos, i save konvenser al padre, kuando se trata de un problema de los ijos. Mezmo en la Tora, kon la ayuda de su madre Rebeka, Yaakov, el ijo grande de İsak, enganyo a su padre por pueder tomar su benediksion.
Los padres judios son buenos, atados a la famiya, i son ombres de sensia. Eyos keren bien a sus famiyas, i miran a prokurar todo modo de komodidad por sus ijos i sus mujeres, para puederles dar una vida buena.
La tradision del padre judio se alarga fin los diyas de Abraham. Abraham, el ombre savido i entelijente, enfluensio su puevlo ke sufrieron miles de anyos de opresion, i reusho a transferar la tradision judia a sus desandantes.
El ombre judio, mezmo si no es relijiozo, duspues ke se aze padre, empesa a azer Kiddush en su kaza las noches de Shabbat para ke sus ijos se ambezen la ley judia, empesan a selebrar las fiestas nasionales, i empesa a yevar a sus ijos a la Sinagoga.
El mas grande dover del padre judio es de pasar la tradison judia a sus ijos.
Las responsabilidades del padre judio estan eskritas en el Talmud: ‘Ensenya la Tora a tus ijos, ensenyalos a nadar (ke es a konoser el mundo), i topales una novya (judia suguro).
