Komo munchos de los lektores del Şalom ya lo meldarian en la prensa lokal o internasyonal, “la Suprema Korte” de los Estados Unidos ratifiko el proyekto de garantizar la seguridad medikal a 25 o 30 milyones de sitizanos amerikanos ke no la poseden aktualmente sea por neglijensya de sus parte o byen prinsipalmente porke no tuvyeron asta agora la posivilidad materyal de obtenerla, topandosen en una situasyon de grande prekaridad ekonomika .
No se si entre estos sitizanos ay o no ay un kualkyer djudyo, lo importante es ke a partir del anyo 2014, 25 o 30 milyones de humanos , rikos komo proves, no se toparan mas en estado de desmamparo en kavzo de grave desrepozo de salud.
Lo importante es tambyen ke en esta epoka de konfuzyon djeneral ande “el Bien i el Mal”, “la djustisya i la indjustisya” son kaji mesklados los unos a los otros, un ombre de kuero muy bruno izo un esforso superhumano kontra una indjustisya sosyal i ke de su parte un otro ombre de konviksyon republikana tuvo tambyen el koraje moral de votar en favor de una desizyon tomada por el partido politiko adverso al suyo.
Munchos diaryos o hebdomadaryos pensan ke este evento de una importansa mayor puede ser konsiderado komo un empesijo de nivelasyon de las ‘kondisyones de kudyos’ en kavzos vitales i asegura la pozisyon del Prezidente aktual Barak Obama en su kampanya elektoral.
Otros son dubitadivos i tyenen el presentimyento ke mas de la mitad de los sitizanos preferarian deshar a kada uno la libertad de poseder o no poseder esta seguridad en momentos de desrepozo.
Personalmente no los entyendo , porke el solo fakto de asegurar gradualmente este derecho a 25 o 30 milyones de individuos por la mas parte proves ke estan oy en la imposivilidad de resivir inmedyatamente los kudyos urdjentes nesesaryos, se toparan desde la aplikasyon de este dekreto, en un estado de kaji egualidad kon los poderozos, lo ke (a el solo) es un argumento pozitivo ke no se puede nyegar.
En desparte de esto, ay en esta ratifikasyon, komo lo dishe mas arriva, un otro elemento esta vez de integridad moral i de ekuidad eksepsyonal.
La ‘’Korte Suprema de los Estados Unido’’ es kompuesta de 9 myembros. Aktualmente kuatro son demokratos i kuatro republikanos i el prezidente John Roberts del partido republikano moderado voto segun su konsensya, en favor de la desizyon del partido sosyalisto.
El avia sido eskojido komo prezidente de la Korte Suprema , sovre baza de su alta moralidad , sin ninguna konsiderasyon politika, durante la epoka del governo de Georges Bush , rezultado al kual, el aktual Prezidente de los Estados Unidos Barack Obama (entonses senator sosyalisto) avia opozado su veto malgrado su absoluta apresyasyon de las kualidades del kandidato en kestyon, ma por la sola razon ke lo konsiderava komo muy rijido en sus desizyones , i mizmo el avia dicho en votando negativamente :”voto negativamente por su sola rijides ma regretare muncho si el rezultado es negativo”.
El Dyo ke mos de a ver el dia de la aplikasyon de este presyozo
