Segun lo ke meldi lunes el 2 del mez koryente en el diaryo elektroniko de la muy serya revista semanal franseza “Le point”, 14 mujeres en vistimyentas de balo, aedadas de 74 asta 97 anyos, partisiparon a un konkurso organizado en Haifa kon el objetivo de obtener el titulo de “Miss superviviente de la Shoah”, lo ke provoko una polemika en Israel .
Se trata del “primer konkurso para selebrar la vida” disho a la “Associated Press” el organizador del evento Shimon Sabag .
En un payis ande biven serka 200.000 supervivyentes esta inisyativa shoko. “topo esto makabro” disho Colette Avital prezidente de un grupo de ayudo a los ke pudyeron salvar de la Shoa.
De mezmo Lili Haber ija de un supervivyente, lakuala dirije tambyen una otra Asosyasyon de Ayudo a los ke pudyeron fuir los kampos de la muerte de Polonya, se eksklamo a su torno:”para kualo organizar un konkurso de ermozura? Topo esto horrivle.
Es lo ke es, 300 mujeres se inskrivyeron en el objetivo de obtener el primer titulo. 14 finalistas fueron eskojidas no por sus ermozura dize el organizador Shimon Sebag, ma por sus historya personal en los kampos de konsentrasyon i los ghettos, ansi ke por sus kontribusyon a sus komunidad.
En efekto, en la nochada anual organizada en favor de la Asosyasyon “Helping Hand” ke avyo una rezidensya para las personas aedadas ke pudyeron salvar de la muerte, kada una de de las partisipantes konto su vida en los kampos de konsentrasyon, delantre 600 espektadores entre los kualos 2 ministros Moshe Kahlon i Yossi Peled el mizmo supervivyente de la segunda gerra mundyal.
Estranyo konkurso, estranyo programa de una nochada karitativa....ma, ansi va la evolusyon de las kozas, lo ke es realmente esensyal es la Vida...la Vida....la Vida.
