Desde un syerto tyempo, komo kaji todos ya lo meldimos asta agora, la Prensa mos mete regolarmente al koryente de los aktos muy desplazyentes ke son perpetrados en Fransya por individuos venidos de la Afrika del Norte, kontra djudyos ke yevan una kipa o kualkyer otro insinyo distinktivo djudyo...
Despues de aver profanado monumentos djudyos santos, tumbas ansi ke vestijyos dolorozos del tyempo obskuro de la Shoa, multiples mansevos de orijen afrikana, fideles a lo ke pensan ser las preskripsyones imperativas de sus relijyon’ empesaron a manifestar sus odyo kontra muestros ermanos relijyozos en varyos lugares del payis, Paris, Toulon, Lyon o kualkyer otra sivdad.
Unos kuantos anyos antes un manseviko djudyo avia sido literalmente arrevatado, enserrado en el mahsen de un apartamente de la periferia de Paris, i salvajemente matado por un grupo de individuos, por la mas parte portadores de una karta de identidad franseza ma eyos mizmos venidos de leshos ....
Ay de esto tres o kuatro mezes, fue el horrivle drama de Toulon en el kual el matador tenia komo objetivo prinsipal de vengarse , sin el meno motivo plozivle i de una manera inkomprensivle, del payis ke le avia dado azilyo ansi ke de sus sitizanos de konfesyon israelita, en matando dos ofisyeres i en atakando la eskola djudia Ozar Hatorah, lo ke kosto la vida a 7 personas, entre las kualas 3 ninyos.
I a la sigida de esta real trajedia, diferentes asaltos en multiples lugares de Fransya kontra mansevikos ke yevan kipas sovre la kavesa.
Es ke la Fransya de Leon Blum, René Cassin, Albert Camus, André Malraux i munchos otros pensadores i eskritores fransezes, devino de muevo una terreno ande el antisemitizmo enflorese i se instala poko a poko de una manera permanente?... ke es la razon de este odyo ineksplikavle, komo venido de la Edad Medya?
Asta ke grado este payis ke mozotros konosimos humanisto, luchador inkansavle de la defensa de los derechos i de la dinyidad del Ombre, va permeter semejantes aktos de barbaria sovre sus tyerra.
Alhad pasado, Manuel Valls Ministro de los Echos interyores de Fransya, ekspreso sovre Radyo J (radyo djudia) su enorme inkyetud. Vos do la traduksyon de lo ke el mizmo disho en lingua franseza: “Ay malorozamente un antisemitizmo ke nasyo en muestros baryos periferikos, ande (al nombre de una identidad ke eyos syenten atakada) mansevos afrikanos desidyeron de atakar djudyos de la manera la mas estupida i la mas peligroza por muestras Valores”.
De su parte, “François Copé” presedente shefe del aktual partido de la opozisyon, disho ay de esto unos kuantos dias: “esto empesando a espantarme”...
Son palavras muy sinyifikativas en la boka de politisyanos ke deklaran frankamente persivir un peligro muy grave.
Es ke este antisemitizmo puedra ser jugulado en unos kuantos anyos ? ken puede afirmar la koza... En todo kavzo ay probabilidad de un aumento de mas a mas grande del shifro de imigrantes, loskualos devyenen de dia en dia mas numerozos por kavza de una natalidad muncho mas grande ke en las famiyas fransezas i de otra parte, me demando envezes: “es ke no ay tambyen un posivle espanto de kontajyon?”. El antisemitizmo es un sentimyento ke la Fransya konosyo de serka en un pasado no muy leshano.
Munchos de sus dirijentes lucharon en el pasado para ekstraer un semblable menospresyo del korason de sus propyos sitizanos ma no se save de una manera segura si los desendyentes de los vyejos antisemites del empesijo del siglo presedente pudyeron deskabuirsen enteramente de los antiguos prejuisyos de sus avuelos, verdadera erensya de un obskurantizmo opako de los tyempos medyevales?....
La semana pasada en su editoryal en el hebdomadaryo LE POİNT, Bernard Henry Levi avlo del desgrasyado suerte kel mundo sivilizado rezervo a Dominique Strauss Kahn... avlo igualmente de este djenero de akoso no solo de la parte de sus enemigos ma tambyen de munchos de sus ansyanos kompanyeros de lavoro i sovre todo de una grande parte de la Prensa fransez, komo un dezeo de eskupir sovre el i verlo arrastado en el lodo el mas apegadozo.
Al fundo, si analizamos de mas serka este kavzo, mos puedemos demandar “ke izo este ombre para mereser un tal kastigo moral i un tal odyo? El no mato...el no arrovo...el no danyo el interes de ken ke sea, byen al kontraryo el izo un maraviyozo lavoro de restrukturasyon del İMF muy provechozo para los tyempos prezentes i los venidore…
Si... el tyene una seksualidad eksesiva, puede ser mizmo obsesiva ke lo pusha a kometer aktos o djestos no muy adekuados a una kandidatura a la Prezidensya.
Si ... absolutamente Si.....el kometyo aktos kontraryos a la pudor, frekuento prostituas, organizo kon eyas nochadas de gozos espesyales, ma es ke realmente el merese de ser a este grado umilyado i arrebashado asta ser arrastado en el kanyo komo un espondjador despedasado?
Munchos prosesos en djustisya fueron avyertos kontra el, por agresyon seksual sin nunka ayegar a kualkyer kondenasyon de la parte de las Autoridades Judisyales.
La tyerra de Descarte, Victor Hugo, Zola ets… fue syempre un terreno de kombate por la egualidad de los derechos sosyales de todos los ombres, kuala sea sus relijyon... una tyerra de toleransa komo igualmente de libertad i envezes, puede ser de una manera imperseptivle, de libertinaje...
Ke es la verdadera razon de este obsesivo akoso kontra DSK? No se save kualo pensar, kualo dezir....ma, es lo ke es, ay en el ayre un real dezeo de destruirlo ke sovrepasa de muncho... muncho la dimensyon de sus faltas...
