La semana ultima estuvimos envitados a la “KOLONİ” ke es la kaza de vakansas en la isla de Burgaz; por pasar una noche de shabat todos endjuntos.
En primero todos ke vinyeron de Estambol, de la Buyukada i de diferentes lugares asistyeron a la orasyon de shabat en la sinagoga de Burgaz ke es una sinagoga komo una perla.
Mansevos, mansevas, chikos, aedados no aviya ni lugar de estar en pyes. Kaliya ver esta vista bendicha!
Despues de la orasyon todos ampesaron a arekojersen en la “Koloni” ariva en una tarasa kon una vista maraviyoza. El tyempo kayente sin ayre, las mezas byen ordenadas, los manteles blankos aparejados por 120 personas. A parte las mezas por las 50 kriyaturas ke vinyeron para pasar un mez aki, estava koza de ver.
La Koloni de vakansas es la organizasyon una de las mas emportantes komo el dover i la misyon ke tyene, de tomar debasho sus alas (kanatlarının altına almak) las kriyaturas de 6 a 13 anyos, para azerles pasar unos doz mezes de vakansas kon felisitad.
Esta organizasyon partaja la kerensya, la amor umana i la amistad.
El presidente “Elio MEDİNA”; organizo esta nochada kon su ekipa en ampesando del
Grande Rabino Rav İsak Haleva kon su famiya, los dirijentes de la sinagoga de Burgaz, los donatores i diferentes envitados.
Elio Medina oy en dia es el presidente del ospital “Or-Ahayim” i entremientes ay doz mezes ke fue elijido (seçilmek) komo presidente en esta organizasyon sakra.
El es muy kapache, un volontaryo ke lavoro en Or-Ahayim de dia i de noche i fue muy reushido.
Elio es un dirijente ke tyene una imajinasyon produktiva (üretken) i fruktuoza (verimli).
El es franko (açık sözlü), persona yena de una enerjiya sin fin, entelijente, aktivo, tyene una vizyon ancha, ombre de proyektos (proje), byenfetor i muy korekto.
Antes de ampesar a komer el presidente
Elio Medina izo una avla kurta remersyando a todos los partisipantes ke asistyeron a esta nochada mostrando sus solidaridad (dayanışma). Avlo sovre la misyon de la Koloni en remersyando “Meri Şild” i toda su ekipa ke esta lavorando de alma i korason para pueder abasteser a las nesesitades de las kriyaturas.
La direktrisa de esta asosyasyon se okupa de las kriyaturas ke tyenen kada dia un korso (kurs) komo
korso de estatua (heykel), de pintura, de inglez i otros.
Dos vezes a la semana se van a kaminar kon barka (tekne) para entrar a la mar i para konoser las otras islas.
El tyempo de komer, de kaminar, de entrar a la pisina, de partisipar a los kursos; es muy byen organizado i los ke vyenen kada anyo tornan a sus kazas muy orozos.
Despues del Kidush ampesimos a komer ke todo estava muy savrozo i muy byen prezentado.
Kaliya ver la intimidad entre los envitados ke estavan avlando, riyendo entre eyos.
Fue una nochada muy reushida yeno de sentimyento. Los partisipantes tornaron a sus kazas kon felisitad.
