“Bivir” es akseptar i somportar la vida... “Egzistir” es asumir la vida. ‘Somportar’ es una atitud pasiva. “Asumir” un akto dinamiko, un esforso para azer de los varyos elementos ke mos fueron dados, una situasyon de la kuala semos munchas vezes relativamente responsavles.
Ize una chika bushkida en varyos diksyonaryos uzuales komo tambyen ensiklopedikos sin obtener kualker informasyon o konosensya espesyal, salvo en un chiko diksyonaryo filozofiko La Rousse, el kual, en rezumen, mos dize kel verbo “egzistir” (exister) es echo de la primera silaba ‘ex’ ke en latino sinyifika ‘afuera’ i de ‘istere’ (tenerse), lo ke aze: “tenerse afuera”, manifestarse afuera,estableser kontaktos kon otros humanos.
La ‘egzistensya’ es ansi el elemento fundamental i dinamiko de la kriansa umana, en una proyeksyon kontinua del individuo afuera de si mizmo, komo un dover de arrankarse de su estado primaryo en una aksyon syempre renovelada.
La kestyon fue formulada a diferentes personas, las dos mijores repuestas fueron las sigyentes.
La primera: “... Si, ay una diferensya esensyal entre ‘unikamente bivir’ i ‘egzistir’… pokas son las personas ke egzisten aunke todos semos bivos. Bivir es sigir el movimyento de la sosyedad sin formular kualkyer kestyon. ‘Egzistir’ es ser si mizmo en su relasyon al mundo, jerar mijor este “ego” ke mos enserra en una vida de dominasyon i de konsomasyon de ‘plazeres futiles’, egzistir es Ser.”
La segunda: “Todo modo de kriansa bive, la egzistensya es lo ke se aze de esta vida, komo eya es utilizada, ansi ke la konsyensya ke kada uno tyene de si mizmo i de los otros.”
Si las analizamos en profundura, estas repuestas son realmente pertinentes.
Una proyeksyon en direksyon de los otros es en realidad, lo ke (en kada ombre o mujer) konfirma su libertad ansi ke su responsabilidad no solo en direksyon de estos otros, ma tambyen en direksyon de si mizmo, de su propyo ‘ego’ instinktivo, lo ke asegura su dinyidad de kriansa pensante kapable de dar, de transmeter i sovre todo de komunikar kon sus proksimos serkanos komo leshanos, malgrado todo lo ke la desferensya de eyos.
No puedo konkluir esta chika eskrita, sin de muevo referarme a esta sublime refleksyon de Emmanuel Levinas ke bazo una grande parte de su lavoro sovre el tema de una “devda permanente” de kada persona en direksyon de “la kara del otro”.
