Si. Ay un tyempo para la rivalidad i el dezorden, I un tyempo para el akordo i la armonia
Komo todos ya lo meldimos, aunke la Keneset ya avia votado 24 oras antes el proyekto de disolver la Kamara, Martes el 8 del mez koryente, la prensa radyofonika Israelyana anunsyo kel partido Kadima se adjunto a la koalisyon governomental Israelyana, despues sekretas negosyasyones entre Benyamin Netanyahu i Shaul Mofaz en el eskopo de formar un Governo de Unyon Nasyonal.
Ansi, en vertud de este akordo, el primer Ministro Israelyano renunsyo a organizar asta el anyo 2013, muevas eleksyones lejislativas i deklaro ke Shaul Mofaz sera dezinyado “Vis Primer Ministro del muevo Kabineto”.
El aunamyento de Kadima al Likud va (por seguro) tener reperkusyones muy pozitivas; se trata de dos partidos de los kualos las ideas, todo en no syendo syempre enteramente iguales, son en todo kavzo muy serkanas las unas de las otras, sin enfohamyento sovre teorias o preseptos antiguos ni prejuisyos sin fundamyento. “Una koalisyon entre eyas dos” es la desizyon la mas rasyonal ke puedia aktualmente ser tomada en la situasyon kompleksa en lakuala se topa el mundo entero, i partikularmente el Oriente Medyo ande fuersas por la mas parte obskurantistas se golpean las unas las otras en una atmosfera de eternal rivalidad...
Ansi en Israel se formo un Governo de Unidad Nasyonal ke puedra tomar desizyones segun la voluntad de la mayoria del puevlo, lo ke de todo tyempo fue dezeavle....i kaji immedyatamente ya se ve komo un chiko movimyento para re-estableser relasyones Israelo- Palestinyanas: “Deklarasyon de la parte de Netanyahu de kerer reempesar negosyasyones kon el partido Palestinyano”, “Voluntad aparente de meter a egzekusyon algunas sentesyas de la Djustisya Israelyana ke prekonizan la destruksyon de konstruksyones fraguadas de una manera illisita”, Letra de Benyamin Natanyahu entregada, por el intermedyo de su emisaryo personal Yitzhak Molcho, al Prezidente Abbas, en Ramalah.
A notar ke, aunke esta misiva no fue konsiderada komo sufizyente de la parte de las Autoridades Palestinyanas, eya es en todo kavzo komo un primer sinyo de voluntad de paz de la parte de Israel.
I de muevo, a esta okazyon, no me puedo detener de revinir sovre la refleksyon de un vyejo amigo de Andre Malraux , el kual dizia ke el 21em siglo sera un siglo de relijyozidad ... “El tenia por seguro razon” i mizmo(aunke me syento personalmente muy atada a la espiritualidad de mi relijyon) tengo la tentasyon de anyadir ke estos ultimos mezes, en algunas sirkunstansyas, la situasyon paresia trespar esta premonisyon en un payis intelektualmete muy desvelopado, en el kual syertos relijyozos se referan munchas vezes a konseptos emanando de dokumentos kadukos, puedeser validos 2000 anyos antes ma absolutamente inadoptavles en el konteksto sosyo-intelektual de muestro tyempo...
Oy en dia no se save egzaktamente komo va evoluar la situasyon, todo dependra de las sirkunstansyas en las kualas los dirijentes seran ovligados de tomar desizyones, ma en todo kovzo el payis tendra a su kavesa personas rasyonales, dezeozas de ayegar a un estado de paz i de real seguridad.
Si, ay un tyempo para la rivalidad i el dezorden. i un tyempo para el akordo i la armonia.
