Alhad pasado fue un dia partikular para la relativamente grande komunidad Djudia de Fransya, un dia de komemorasyon amarga de la trajedia del “Vel’d’Hiv” akto preliminaryo de la deportasyon de mas de 15000 refujyados djudyos,entre los kualos 4000 ninyos, loskualos desde antes la segunda gerra mundyal, avian bushkado avrigo en el payis de Victor Hugo i Leon Blum.
I en mizmo tyempo, Alhad fue paradoksalmente un dia de rekonforto moral ande parese espuntar un rayo de esperansa.
Es malorozamente una realidad ke ay de esto un syerto tyempo, se syente en Fransya un antagonizmo de dia en dia kreshente (por no dezir de un aborresimyento envezes kriminal) kontra muestros korelijyonaryos, de la parte de numerozos myembros de las komunidades kompuestas de sitizanos orijinaryos de la Afrika.
Komo por seguro ya lo savesh byen, el Konsilyo jeneral de las Komunidades Djudias de Fransya, organiza kada anyo una semejante seremonia de reminisensya ande kaji syempre son kombidadas i asisten altas personalidades del Governo.
No mos olvidaremos ke la Fransya fue el primer payis Evropeo a aver dado a los djudyos ke se topavan sovre sus tyerras, el estatuto de “verdaderos sitizanos fransezes” ...no mos olvidaremos tambyen ke es en este payis, a una epoka de nasyonalizmo ardyente, ke Emile Zola tomo la defensya del kapitan Dreyfus akuzado falsamente de traizyon i pronunsyo el afamado “J’accuse”, lo ke le pudia kostar su libertad.
Esta vez, François Hollande, aktual prezidente de la Republika Franseza, pronunsyo un diskorso muy fuerte en un lenguaje muy klaro, sin el meno ekivoko. El disho de una boz ferme: “El krimen del ‘Vel d’hiv’ fue perpetrado en Fransya, por la Fransya’ (Ce crime a été commis en France, par la France…)
Ansi, komo lo disho la revista “le point” el Shefe aktual del Estado Fransez rekonosyo publikamente la entera responsabilidad de su payis en la deportasyon durante el periodo del nazizmo, de los djudyos por la mas parte estranjeros ke se topavan en su payis.
Este evento fue kaji tenido en estado de sekreto, durante largos anyos despues la fin del konflito ke ensangreto la Evropa i es solo en el anyo1995 kel prezidente Jacques Chirac tuvo, el primer, el koraje de denunsyar la responsabilidad de la Fransya, lo ke syempre kedara en las pajinas ke le seran konsagradas en la Grande Historya komo un manadero de luz eternal.
François Hollande se refero byen entendido a este fakto i adjunto ke este krimen fue no solo un golpe asasino kontra los djudyos, ma tambyen kontra el onor de la Fransya, ansi ke kontra sus valores fundamentales i su İdeal.
El afirmo ke todo sera absolutamente echo para ke la SHOHA tenga su lugar byen vizivle en los livros eskolaryos de historya, de todos los edifisyos de ensenyansa, sin eksepsyon.
Esta afirmasyon es muy importante, partikularmente en la lucha kontra el negasyonizmo i el antisemitizmo.
Los dias avlaran…
