Es ke la vida devino tanto barata? una kestyon ke me obseda desde unos kuantos dias.
Tres kavzos (kada uno de entre eyos enteramente diferente de los otros en su esensya, aunke la sorprendyente similitud de sus konsekuensas) akontesyeron estos de alkavo dias:
Vo los sito, sin ningun orden chronolojiko:
El uno, en Bulgaria, el atake kontra un otobus ande se topavan prinsipalmente turistos Israelyanos. No se realmente komo definir este akto; puede ser “produkto de un fanatizmo syego en su ferosidad i inhumano en la absoluta absensya de kualkyer espiritualidad” aunke realizado al nombre de una pretendida motivasyon relijyoza
El otro en los Estados Unidos, totalmente inkomprensivle, produkto probavle de un esprito ke se undyo en el abizmo de la lokura, o produkto de una intelijensya dominada por un odyo obsesyonal por todo lo ke es vida, sin kualkyer distinksyon de orijen ni de ideolojia… akto absurdo, akto insinyifikante, komo un djenero de absoluto nihilizmo i de negasyon total de kualkyer valor egzistensyal.
El treser, en Israel mizmo. İnkomprensivle, el fakto (en sinyo de protestasyon kontra la politika sosyal de su payis) de eskojer la muerte, su propya muerte en metyendo fuego a sus propyas vestimyentas, lo ke kosto la vida al ke lo izo.
“Akto prohibido por la relijyon djudia’’ diran los unos, akto de bravura djuzgaran los otros.
Ma deke rekurir a la muerte para afirmar sus ideas o simplemente sus menesteres, en un payis demokratiko, ande la libertad de ekspresyon es total i ande se puede protestar ansi ke manifestar su dezaprovasyon sin espanto?
Ay otros medyos para ayegar al rezultado dezeado…la muerte no rezolve ningun problema …I mizmo si es para solevantar el puevlo i yamarlo a luchar, la muerte es al kontraryo una renunsya a la lucha, un djenero de abdikasyon, lo ke ninguno tyene el derecho de azer.
Si, en los tres kavzos ay un punto komun: “el renyegamyento de la valor de la vida”.
Es ansi de la kriansa humana a la kuala fue dado un muy chiko fragmento de tyempo, kon la posivilidad i puede ser mizmo el dover de deshar detras de eya, una trasa pozitiva de su pasaje sovre tyerra. Es a eya por seguro ke inkumbe el dever de eskojer i de apartar ‘lo bueno’ de lo ‘negro’.
A este propozito, una kestyon espunta: “Es ke estamos aparejando muestros ijos i ijas a azer la seleksyon la mas pozitiva? Desde sus ninyes, los enkashamos en una atmosfera de eternal kompetisyon, kaji de konkorensya kon sus kontemporeanos de mizma edad, lo ke (no se puede nyegar) ayuda muncho a desvelopar el progreso mekaniko komo tambyen syentifiko… ma ken dize konkorensya dize tambyen voluntad, chika o grande, de sovrepasar el otro …i munchas vezes no se save asta ande puede ir este dezeo…
Deke al lado de la ensenyansa de las matematikas, fizika o kimika, no konkonsakrar tambyen un largo tyempo a la ensenyansa (en las eskolas komo en las famiyas) de un verdadero aprentisaje de las simples valores humanas en plasandolas al mizmo nivel ke las otras i mizmo mas arriva ke las otras...
Esto no es de mi parte un renyegamyento de la importansa de lo ke yamamos ‘el progreso’ ma una simple observasyon entre munchas otras de la urgensya de insistir tambyen sovre la grandor del simple humanizmo aksesivle a todos.
Si….Ninguna semejansa entre los tres kavzos i portanto un punto komun, uno solo , un desdenyo por la vida mas grave kel nihilizmo del 19en siglo, un desdenyo ke puede ir asta el derrokio total de las valores esensyales de la egzistensya.
