En kual ekstremizmo ke sea, ay un elemento negativo muchas vezes mortifero ke ayega kaji syempre al derrokamyento de si mizmo en su tentativa loka de destruir los otros
-Segun lo ke la prensa internasyonal mos dize, la komunidad Djudia de Fransya se topa en este momento en estado de grande inkyetud despues varyas tentativas de atakes de la parte de grupos djihadistos fanatikos.
Ay poko tyempo de esto, una selula de estos ekstemistos ke aparejavan muevos golpes kriminales kontra el djudaizmo, fue destruida por el Governo i los partisipantes fueron arrestados o se topan debasho alta vijilansya.
El Prezidente de la Republika Franseza François Holande i el Ministro del İnteryor Emanuel Vals trankilizaron los dirijentes de la Komunidad Djudia ke fueron invitados a diskutir sovre este sujeto i sertifikaron kel kontrol sera ainda mas renforsado afin de impedir kualkyer akto asasino.
En todo kavzo, el Prezidente insistyo (kon razon) de nos azer ningun amalgamo entre Islam i dhihadizmo.
Bendicho el Dyo, las dos grandes komunidades de Fransya, la Muzulmana i la Djudia (todo en guadrando kada una la integralidad de sus kreensas i tradisyones) lavoran la mas parte del tyempo en la mizma direksyon, mano kon mano, kaji syempre solidaryas en un mizmo dezeo i mizmo esforso de armonia i paz.
Las dos grandes institusyones, kada una kon sus preseptos relijyozos, sus ritual i sovre todo sus Kodigo Ethiko, se syenten muy serkanas la una de la otra en los prinsipyos i reglas morales ma malorozamente ay vezes ande okure una deviasyon inkontrolavle provokada por un fanatizmo eksesivo.
Todos savemos ke (kual sea el kavzo) el ekstremizmo es kaji syempre portador de una falsa vizyon de las kozas i las teorias sovre las kualas el repoza kontyenen elementos destruidores en sus renyegamyento de kualkyer otra valor.
Verso la fin del Venten siglo, un grande pensador fransez avia dicho kel ‘Vente i unyen’ iva ser una grande era de relijyozidad profunda.
Malorozamente asta oy en dia, el siglo prezente fue sovre todo una era de ekstremizmo i de ekseso syempre negativo i destruidor.
Ke va ser el rezultado de la rezistensya a este koryente de pensamyento loko, relativamente muevo, ke pusha kontinualmente a destruir i eliminar el otro? Todo depende de la sagasidad de los verdaderos savyos , los kualos kaji syempre en los siglos presedentes se esforsaron de no sovrepasar las djustas limites de sus teorias.
