Ya pasimos las fyestas; Rosh-Ashana, Kipur, Sukot i Simha Tora kon grande entuzyasmo.
Esperamos ke la mueva anyada sera para mozotros, todos los djudyos del mundo; una anyada yena de esperansa, sanedad, trankilitad i pas.
Este anyo komo kada anyo fyestimos kon mi marido i mi famiya, las fyestas en la Sinagoga de Burgaz.
La sinagoga de Burgaz es una djoya, una sinagoga chika ma ke tyene una entimitad kon todos los ke vyenen. Una keila es alegre kon la djente ke asiste a las orasyones, a las fyestas i a todo modo de evenementos.
Un shabat demanyana despues de la orasyon asistir a una seuda en el kal de Burgaz es un privilejyo (ayrıcalık). El Grande Rabino Rav. İzak Haleva i el Rav. Davit Sevi kontribuan (katmak) a la santedad (kutsallık) del dia de shabat kon la ardor (şevk) ke meten a la meza de la seuda.
En Rosh-Ashana i Kipur la sinagoga estava yena. Todos meldando i partisipando a las orasyones, el hazan “Selim İyigör” kon su boz ermoza artikulando las palavras una por una (kelimeleri tane tane okumak) tanto ke todo se estava entendyendo; aviya una kayentor sakra (kutsal bir sıcaklık), i lo mas emportante fue la ora del “Shofar”. La keila de Burgaz no sintyo este modo de Shofar en tantos anyos.
El hazan “Beni Albukrek” kon su boz maraviyoza i mirakuloza mos emosyono tanto ke mos izo tremblar los sentimyentos ke todas las mujeres estavan yorando. Este modo de boz no se tyene visto.
Lo felisito de aryento mi korason. Ke e l Dyo le mande la fuersa de kontinuar.
Por Simha-Tora mos fuimos a Neve-Shalom.
Neve-Shalom, es la sinagoga prensipala i la mas famoza de los djudyos de Turkiya. Es la sinagoga la mas mueva i la mas grande de Estambol. Todas las bodas ke se realizan aki, tyenen una ermozura espesyal.
Ma malorosamente no aviya bastante djente en Neve-Shalom. Kada anyo la djente se esta aminguando. Malgrado ke no aviya kriyaturas, aviya turistos de
Los Angeles i de Israel ke fueron entuzyastos (coşkulu) de asistir a esta fyesta en este kal grandiyozo.
Simha-Tora es una fyesta muy diferente seyga de azer baylar las Sefer-Toras, seyga de echar bonbones enriva de las Sefer-Toras, kantar de una boka i azer “Hora” todos endjuntos.
El Dyo ke mos ayege para kada anyo!...
Despues de este mes sakro yeno de fyestas una de detras de otra, va mos a tener un invyerno yelado, kon tyempos ariskuros.
Esta sezon mos da la posibilitad del desvelopamyento personal kon aktivitades diferentes; seyga en iyindo a los teatros, filmos, ekspozisyones, seyga en iyindo a los konsertos, a diferentes kursos de lingua u de pintura para pasar el tyempo en yeno.
La semana ultima la presidente de las mujeres
“Beki Muaraf” me envito al azilo de los aedados “İhtiyarlar Yurdu” myerkoles midi ke fue un dia ande partisiparon 80 mujeres de todas las organizasyones i asosyasyones (dernek ve kurum) ; un dia de solidaridad.
El salon estava organizado komo una boda, byen aklarado, byen duzudeado, las mezas ornadas, el menu muy delikado. Estuvimos byen sirvidos por el personel. Paresiya a un salon de un otel kon las komidas ekselantes. Despues de la avla kurta de la presidente empesimos a komer. A la fin “Liz Behmuaras” la famoza eskrivana avlo sovre los sujetos de los livros ke eskrivyo fina oy. Komo empeso a eskrivir, komo desido de eskrivir sovre sujetos diferentes. Fue muy enteresante.
Alhad el 7.10.2012 el Dia Evropeo de la Kultura Djudia se realizo en Galata.
El sujeto de este anyo fue “el Humor Djudyo” (Yahudi Mizahı). Aviya aktivitades diferentes en las sinagogas;
Neve-Shalom, sinagoga Italyana, Ashkenaz, el orno de matsa, en “Schendeirtempel” (el sentro de arte) i en otros lugares istorikos.
Entre los ke asistyeron oras de midi muncha djente se fueron a Barınyurt para komer komidas sefarades komo; kashkarikas, armi de tomat, tapada de berendjena, koftikas de prasa i halva de semola.
Aviya unos kuantos paneles, ekspozisyones de pintura, konsertos, teatro i konferensyas enteresantes.
Entre los partisipantes musulmanos una grande majoritad asistyo por la primera ves a este dia i estuvyeron kontentes de konoser la kultura djudiya sovre munchos puntos de vistas diferentes i enteresantes.
Felisitasyones a todos los ke dyeron un grande esforso i apoyo para aparejar este dia de kultura.
