(Finif Neshomos Far Finif Neshomos) Este kuento esta pasando en los diyas de muestra “Fyesta de Luz”. Un pasaje komo un rayo de esperansa en el universo oskuro del Holokosto. Vale la pena de meldarlo...
Traduksyon-Adaptasyon: COYA DELEVİ
La Sra. Schiff batyo a la puerta de la mishpaha Spitzer. Una manseva, la kara iluminada de plazer a la vista de su vizitadora, la tomo a un interyor muy semple. Giveret Spitzer era madre de sinko maraviyozos bebes nasidos despues de 9 anyos de kazamyento... Naturalmente, el kupl ke asta agora teniyan una vida muy modesta, kon el nasimyento de sus ninos, kedaron entonses sin un grosh... L a Sra. Schiff, djustamente aviya vinido para prezentar la chika suma, rezultado de una “kojeta” organizada para ayudar la famiya en estrechura.
La dama entro, kontemplo kon kerensya los sinko inosentes durmyendo. Fue atirada por una foto en la pared, aryento de un kuadro elegante. Sintyondose travada por una fuersa misteryoza verso la foto: “Una figura de mujer muy familyar...” penso, i kayo embasho desmayada. De vista fue transportada al ospital kon la ambulansya prevenida por Giveret Spitzer. Apenas la nikochera se vino en si, la primera koza fue demandar la identidad de la dama en la foto. “Era mi kerida madre, ke pyedri antes un anyo,” respondyo la Sra. Spitzer. La Sra. Schiff revenida de su fuerte emosyon, le deklaro tener una estorya a partajar:
“Teniya 15 anyos kuando fui embiyada al Kampode konsentrasyon Bergen-Belsen, i plasada en una baraka kon setenta ijikas entre 14-16 anyos. La mayoriya de estas muchachas aviyan abandonada sus Fey, visto las sirkumstensyas. Ma, yo djuntos otras 4 amigas perkurimos a kedar fidelas a muestros preseptos. Rivke,muestra konsorte, avyendo sintido del Rabbi ke era erev “Hanuka”, disho kon eksitasyo “Devemos asender la “MENORA”! Ma komo?...
“Alora mos asentimos azer un plano. Desidimos de dar a una ijika lavorando en la fabrika, muestra rasyon jurnalyera de pan, en kontravalor de un poko de azete. Dos pyedrizikas ivan a servir a asender las mechas konfeksyonadas kon los ilos de muestras uniformas. Lo ke mos mankava era una “Menora” para kontener lo todo endjuntos. Pensimos ke kashkaras de patatas iva ser lo mas fasil a prokurarmos en las kondisyones aktualas.
“A medya noche, myentres el troke de guardiya, la kuzina kedava vaziya por sinko puntos. Desidimos ke una iva entrar este momento, las otras kedandoafuera, prontas para prevenirla en kavzo de sekana. Entri yo, kon el korason batyendo salvajamente en mi pecho. Reseloza, me aserki de la bota d’esyerkol, i ampesi a eskarvar metodikamente su kontenido...Estava pudyendo oyir mi estomago kavakandose de ambyertura, lo ke me izo echarme a la boka, sin dinguna ezitasyon, restos de komida...A la fin ya topi dos ermozas! kashkaras de patata, todo en kontinuando a bushkar, echi un ojo por la ventana, vide Sarale azyendo djestos alokados “Presto Hanna, sal de ayi!!.”
“Komo pudiya salir, solamente kon dos kashkaras? Torni a la bota, a mi bushkidad kon un sentimyento de panik, esparzyendo kon freneziya su kontenido en todas las direksyones”. “HALT!” “Alevantando la kavesa, vide el ofisyal nazisto, arma apuntada a mi, sonriendo kon un ayre kruelo. Mis amigas a sus lados, estavan blankas, tremblando de terror.”
“Serash kastigadas por este grande! krimen de rovo. Amanyana todas las sinko vash a ser enkolgadas delantre el kampo entero. Ansi todos van a konoser la punisyon ke merese el arrovar”...“İ kon estos byervos el ofisyal mos desho liberas asta el diya sigiente. En la eskuridad espesa, mas amenazante, tornimos a muestra baraka, i mos asentimos al derredor de la “ Presyoza Menora”, las sinko amigas, evokandolos rekuerdos de akeyas fyestas de “Hanuka” ke pasavamos kon muestras famiyas. Mos akodrimos de la majestuoza Menora de plata ke asendiyamos i los djugos de despues. Mas muncho de todo, mos akodrimos del sentimyento de unidad ke no mos abandonava. Sentimyento de seguridad ke eksperyensa el benadam kuando esta al lado de su famiya...İ yorimos, yorimos oras enteras....
“Yorimos en pensando a estos serkanos ke ivamos a topar despues de unas, kuantas oras...Rivke iva ver sus keridos paryentes fuzilyados...Yo iva topar mi chiko ermaniko bebe de un anyo, ke estas brutas nazistos aviyan matado...Todo en yorando asendimos la Menora emprovizada. La flama bivyo apenas un segondo, ma, sufizyente para dar “LUZ” a muestras almas abatidas...
a kontinuar...
