Malgrado su dispersion i su nomadismo, malgrado los masakros, este puevlo de viaje, gano un grande avantaje. Munchos tenian famiyas ansi ke konosensyas en diferentes paizes i esto fasilitava la komunikasyon i el komersio. Eyos se izieron komersantes i sarrafes muy importantes i apenas ke se konstruizava un porto muevo en kualker parte del mundo, eyos ya eran los primeros ke se instalavan kon sus programas de komersio.
Kon esta formasyon i eksperiensia de munchos anyos, se puede pensar ke este puevlo kontribuo a preparar el komersio internasyonal de muestros dias.
Depues ke tuvieron un periodo de oro en Espanya entre los siglos 10-12, kon la enkizisyon en la peninsula iberika, los judios i los “Maranos” ke kedaron en vida se dispersaron en diferentes paizes I lo ke se puedieron yevar kon eyos, era ‘su Dio uniko’, ‘su kultura’ i su saviduria. I ansi, en el siglo 17. en Amsterdam, se formo una komunidad enteresante donde la mayoria era kompuesta de “Maranos” desendientes de judios. Munchos tenian parientes katolikos ke se avian konvertido en el tiempo de la enkizisyon. Ansi, komo fueron kultivados entre dos religiones “el kristianizmo i el judaizmo”, eyos tuvieron una grande libertad de komportamiento i de pensamyento, sin tener la pression de una religion.
Estos sefarades de Amsterdam kon sus kostumbres i sus manera de bivir, kon su edukasyon i su aparensia, fueron buenos ekzemplios para su entorno. En esta atmosfera de tolerensia, nacio el primer filozofo judio moderno, Baruh de Spinoza. El fue formado kondjuntamente kon la kultura hebrea i la latina.
El fakto de la ekspulsyon de Espania i la kristianizasyon de una parte de los Judios, ke despues de un syerto tyempo retornaron al Judaismo, fue una situasion historika empressionante i fenomenal porke ansi la kultura judea-kristiana ke avia empesado kon Jesus i sus disiplos, los kualos eran 100% judios, estava kontinuando. Puedemos dizir ke esta kultura judeo-kristiana fue el empesijo del kosmopolitismo.
En esta mizma epoka, en el Imperio Otomano, Sabetay Sevi se deklaro el muevo profeta del Judaizmo, ma los hahamim judios no lo akseptaron i se kesharon al Sultan, lo ke ovligo el falso profeta a azerse musulmano, enjunto kon sus disiplos los kualos fueron yamados
“Donme’’. La differensia entre los Donmes i los Maranos, es ke eyos no tornaron mas al judaismo, ma tuvieron una grande influensa en el İmperio Otomano i en la formasyon de la Turkia moderna. Entre eyos se puede dizir ke avia la kultura judea musulmana.
Kon la formasion de los Estados Unidos, un otro viaje importante empeso para los judios . I ansi se developo ayi una mueva komunidad Judia kon la esperansa de bivir kon todos los derechos humanos. Los ke se fueron a instalarsen aya no avian yevado kon eyos moneda, ma sus eksperiensias ke les permetyo de partisipar al grande desvelopamyento de este paiz. En el siglo 20, los Estados Unidos devinieron la primera potensia del mundo, kon sus judios de grande influensa.
Kon estos viajes ke kontinuan, en el puevlo judio se formo, una grande fuersa de adaptasion i de intelijensia analitika, porke la sufriensia i el viaje traye una saviduria partikular. Eyos tuvieron un rolo grande en la historia de las ‘ideas’, i en el mundo moderno.
Estas eksperiensias de miles de anyos, se puede eksplikar kon el alto porsentaje de premyos Nobel atribuidos a los Judios de differentes paizes.
SUZET FRANSEZ
