“Ke me sean dados: ‘La fuersa de suportar lo ke no puede ser trokado’, ‘el koraje de trokar lo ke puede ser modifikado’ i tambyen ‘la sagasidad de distingir el uno del otro’. (palavras pronunsyadas de parte de un vyejo Monarko antes de asumir el poder).
Komo todos ya lo meldimos en la Prensa İnternasyonal, Djueves pasado kon una enorme mayoria de votos pozitivos entre los kualos los de multiples payizes evropeos, ansi ke 49 abstensyones kontra 9 bozes negativas, la Organizasyon de las Nasyones Unidas (ONU) respondyo afirmativamente a la demanda de Mahmud Abbas de akseptar en su seno la Entidad Palestinyana en kualidad de ‘Estado observador no myembro’.
Komo lo vimos mas arriva, a la eksepsyon de los 9 votos negativos, pokos payizes protestaron kontra esta desizyon. Yigal Palmor, porta-boz del ministeryo de los echos estranjeros İsraelyanos, disho. “Los palestinyanos estan perpetrando una violasyon flagrante de la desizyon resiproka de reglar el konflito kon negosyasyones bilaterales i no kon mezuras unilaterales.
Djueves la noche, Hilary Clinton, en su kualidad de reprezentante del Governo de los Estados Unidos, blamo tambyen la rezolusyon de la ONU, ma Vyernes la tadre, eya ekspreso klaramente su deskontento konsernando esta vez la desizyon del Governo Israelyano de fraguar 3000 muevas moradas en las kolonias ke se topan al Este de Yerushalayim, las kualas son el punto el mas sensivle del litijyo Israelo-Palestinyano i lo ke puedra krear una atmosfera espesifikamente negativa.
Komo lo disheron multiples Ombres de Estado evropeos el dia mizmo de la sesyon de votasyon en la ONU: “Las opinyones sovre el problema İsraelyano/Palestinyano son puedeser diferentes, ma en este momento lo ke es esensyal es la nesesidad absoluta de paz en el Oriente Medyo”.
Lunes, Laurent Fabius, Ministro fransez de los Echos Estranjeros, konvoko el embashador Israelyano Yosi Gal i protesto kontra el proyekto de muevas implantasyones en Yerushalayim i Sisjordania.
Por seguro ke ninguno tyene realmente el derecho de afirmar kual kamino es el mijor, ma es una verdad ke aktualmente el esensyal es de empesar de muevo negosyasyones entre los dos Estados vezinos kon una sinsera voluntad de ayegar a una solusyon akseptavle de las dos partes.
Me akodro aver meldado, anyos antes, la refleksyon de un eskritor fransez ke dizia: ‘La Regla de Oro de kondukta en kualkyer diskusyon es la toleransya mutual, por la sola razon ke es imposivle ke las dos partes puedan pensar de la mizma manera, kada una ve una sola parte de la Verdad i esto a partir de angulos diferentes.’
