Muestro amigo Avram Behar mos mando la traduksyon de un artikolo de la gazeta Israelyana ‘Yediot Ahronot’ konsernando la atribusyon del Premyo Medicis al eskritor Israelyano A.B. Yehoshua, la kuala vos transmetemos literalmente debasho estas Linyas:
“El Premyo valutozo MEDİCİS para literatura estranjera al eskritor A.B. Yehoshua por su ovra MERSED SEFARADI.
El romanso del eskritor İsraeli A:B: Yehoshua, Mersed Sefaradi, fue el meresedor. ‘Mi livro fue elijido entre 500 livros i esto me kayento el korason’.
Yehoshua, uno de los eskritores famozos fue meresedor este anyo a resivir el premyo Medicis fransez para literatura estranjera.
‘Mersed Sefaradi’ ke salyo a luz el anyo pasado en ebreo de parte de la Libreria Mueva, fue tresladado a munchas linguas, entre eyas la lingua franseza, i fue muy popular por la imajinasyon i la rikeza ke Yehoshua manifesto .
‘Premyos van i vyenen. Syempre so alegre de resivir un premyo por lo ke amo yo azer’
Yehoshua no va resivir alguna suma de moneda, por modo ke todos los premyos son dados en onor i omenaje al livro el mas emportante del anyo. Este premyo de Medicis es konosido komo el premyo el mas valutozo. Este premyo fue fondado en 1958 de parte de Gala Barbisan i Jean Pierre Giradoux.
Kuando Yehoshua supo, atras unos kuantos diyas, ke resivyo el premyo, el partyo a Paris para asistir a una tadrada por oyir tambyen a los juezes. El se maraviyo por el eko ke resivyo su livro. Aunke eran diyas de las eleksyones en los Estados Unidos, lo ke les entereso a los fransezes fue el livro de Yehoshua ‘Hesed Sefaradi,Mersed Sefaradi”
Agradesemos kon grande gratitud Avram Behar por su pensamyento yeno de amistad.
