Una de las kestyones ke en este momente preokupa lo mas el Governo aktual de los Estados Unidos es: “Eske la Nasyonal Rifle Association (NRA) ke goza de una grande influensa en el Kongreso, va permeter un kualkyer trokamyento en la ley konsernando la aktual libertad de vendida de armas.
Byen entendido una modifikasyon esensyal de los vyejos artikolos de la konstitusyon (sovre el avantaje para kada individuo de yevar una arma sovre si, afin de pueder protejarse) es absolutamente nesesarya i devyene de dia en dia mas imperyoza.
Despues del drama de la eskola primarya Sandy Hook de Newtown en el Connecticut, el prezidente Barack Obama (aunke facha a facha kon una opinyon ansestral estriktamente obedyente a varyos artikolos de la Konstitusyon, loskualos datan de 200 anyos antes) realizo la gravedad de la kestyon i tuvo el koraje de asumir immedyatamente su dover imperyozo de defensor de la vida de su puevlo. Ansi el kargo el Vice Prezident Joe Biden i su ekipo de aparejar asta el mez de Enero, un muevo proyekto de ley sovre la reglementasyon de la vendida des las armas de asalto.
El disho “No se savra puede ser nunka deke esta trajedia akontesyo, ma savemos ke kada dia otras personas riskan la muerte por kavza de armas a fuego. Este djenero de violensa tyene konsekuensas terrivles para muestra sosyedad i si puedemos azer kualkyer koza para impedir semejantes faktos, kada uno de entre mozotros tyene el ovligo de azerlo.”
Por seguro ke esto no sera kompletamente sufizyente para impedir de una manera absoluta la repetisyon de semejantes djestos dramatikos, ma el shifro de muertos lojikamente amenguara kon el kontrol i sovre todo kon la prohibisyon de armas sofistikadas ke tyenen la kapasidad de matar en un golpe un shifro muy importante personas.
La egzekusyon del dicho proyekto no sera por seguro muy fasil. Es verdad ke munchos sitizanos realizaron su absoluta imminensya, ma otros, atados de una manera syega a vyejos dekretos, refuzan de akseptar ke estos artikolos tomaron aktualmente un karakter no solo kaduko ma muy perikolozo.
Si… malgrado su absoluta voluntad i sus sinseros esforsos, eske Barack Obama parvyendra a venser esta inkondisyonal obedensya al kulto de los vyejos komandamyentos?
Por seguro ke el problema esensyal no se topa solo en la prezensya de armas a distansya de mano, ma esto riska de modifikar la natura de lo ke puede ser ‘un simple momento de ravya o de revolta de un individuo en estado de grande kolora’ en ‘verdadera trajedia umana’ .
No kale olvidar ke aktualmente, la vida devino para la mayoria de las personas i partikularmente para los jovenes, un djenero de kontinual kompetisyon ke empesa kon el asigo inevitavle de los eskolaryos de dever ser entre los primeros de sus klasa afin de tener akseso a las grandes universidades, lucha insesante ke munchas vezes no permete a los chikos de bivir la dulsor de sus ninyes ni a los adolesentes la esplandor de azer los primeros pasos en el espasyo de una independensya muevamente asumida.
Al pareser, paradoksalmente, el progreso tekniko i mizmo simplemente intelektual devyene (raramente es verdad) para algunos, no un manadero de agremento en sus esforsos, lo ke es muy pozitivo , ma un ovligo de luchar kontinualmente mas aya de lo ke permete sus potensyal individual.
Varyos investigadores en psikolojia afirman ke numerozos mansevos todo en esforsandosen de azerlo, no parvyenen a sigir el ritmo loko de lo ke yamamos ‘adelantamyento’ ; keda ansi en sus korason un sentimyento de profunda amargura ke, envezes ,a la sigida de varyas sirkunstansyas, puede trokar de natura i de intensidad.
Oy se trata tambyen de rezolver este muy difisil problema de natura humana.
