Trezyentos kilometros al nordeste de Buenos Aires, ay una chika sivdad, Moises Ville, ande el puevlo es kinze por sien judios. Ma, komo si el puevlo entero fueran judios, en las fiestas judias, todos los magazenes son serrados , todos komen ‘gefillte fish’, i tienen una biblioteka yena de livros en ebreo i en yiddish. En ‘Moıses Ville’, ay kuatro Sinagogas, ma no tienen un rabino ke se esta aya el anyo entero.
‘Moises Ville’ fue fondado en 1889 por judios ukranianos ke fuyeron de su pais. Estos judios empesaron a kultivar la tierra en Arjantina, izieron agrikultura i se okuparon de animales. Anyos duspues, la majoridad de los judios ke biven en Moises Ville emigrarona Buenos Aires, i a otras sivdades. Ma, las tradisyones judias de Moises Ville no trokaron.
Oy, 250 000 judios biven en Argentina. Kaje todos los judios tienen profesiones, o se okupan de komerso. Los ke kedaron en Moises Ville son los mas viejos. Un tiempo, el puevlo entero de Moises Ville biviyan en armoniya.
Debasho de la dominion del diktator Peron, munchos Nazis se aviyan enstalado en Arjantina. Adolf Eichman era uno de estos Nazis. Komo lo savemos, los israelianos lo aviyan fuyido de Arjantina en el anyo 1961. El juzgado de Eichman en İsrael, fue el empesijo del antisemitizmo en Arjentina akeyos anyos.
Entre los anyos 1976 , 1983, Arjentina se konvertio en una diktotoria militar. El governo dirijo el pais kon teror i mueve mil personas fueron asasinados; entre eyos aviya mil judios.
En el anyo 1983, Raul Alfonsin fue elijido Prezidente de Arjantina. Carlos Menem, de orijen siriano lo suksedo. Menem era amigo de la komunidad judia. Menem metio judios a munchos postos del governo, vijito Israel munchas vezes, i izo apanyar los ke destruyeron un simeterio judio. Ma, los teroristos arabos bombardearon la ambasada de İsrael en el anyo 1992, mataron 32 personas, i en el anyo 1994, bombardearon el sentro de la komunidad judia en Buenos Aires, mataron sien personas, i dozientas personas fueron firidos.
En Arjentina, ay munchas organizasyones de la komunidad judia. En el anyo 1939, ‘Delegasion de Asosiasiones İsraelitas Arjentinianas’ fue fondada para aksionar komo el braso politiko de los judios ke biven aya. Este grupo reprezenta los judios en el governo, i se okupa de los derechos de los judios. En Buenos Aires, ay unas kuantas Sinagogas reformistas, tambien vente i ona Sinagogas konservativas, i sukuenta Sinagogas ortodoksas. Estas Sinagogas fueron konstruidas antes de la Segnda Gerra Mondial. El Seminario Teolojiko Judio tiene una brancha en Buenos Aires, i nombro la primera mujer rabino en el anyo 1992.
Oy, la komunidad judia de Arjentina esta aminguando de diya en diya. Munchos judios estan emigrando a İsrael, o a los Estados Unidos. La ekonomika del pais no esta buena. Munchos judios estan tomando ayuda de la Sinagoga. Munchos peryeron sus kazas porke no estan puediendo pagar los gastes. Mezmo ke el puevlo entero estan sufriendo de la ekonomika, los arjentinianos estan akuzando los judios por las problemas del governo. Por esta razon, uvo grande emigrasion a Israel.
