La semana pasada meldi en el sityo elektroniko “Jerusalem post en français” un artikolo datado del 25-12.2012 i sinyado por Danielle Ziri sovre el terrivle grado de provedad ke egziste desde unos kuantos anyos en Israel, situasyon ke gradualmente se agrava malorozamente kada vez mas
El otor del artikolo mos dize lo sigiente ke traduzo en Judeo-espanyol:
“En su raporto anual sovre la provedad, publikado el 17 Desembre, la asosyasyon LATET ke ayuda a los mas kastigados por la kriza ekonomika, konsidera ke 2012 fue un anyo oskuro para el Estado Ebraiko.”
Una chika invistigasyon ke ize a este sujeto me dyo los shifros sigyentes de la evolusyon de la mizerya en Israel desde el anyo 2009:
“Kaji un kuarto de la populasyon israelyana ke se topa en estado de shomaje o de lavoro parsyal” no parvyene a asegurar un mantenimyento seguro a sus myembros, mizmo kon el ayudo sosyal ke resive.
Segun el Raporto de Bitouah Leumi de novembre 2010: ‘123.500 personas pasaron debasho el umbral de provedad en 2009’ i ansi el shifro de sitizanos ke se topan en estado de grande difikultad ekonomika aumenta progresivamente de una manera ineluktavle”.
Al pareser, malgrado el maraviyozo enfloresimyento de la ekonomia Israelyana i el sukseso aktual sin presedente de su Alta Teknolojia, oy en dia , un israelyano sovre kuatro bive en estado de grande estrechura ekonomika, solo un mansevo sovre tres, tyene la posivilidad materyal de azer estudyos universitaryos.
‘La provedad es un muy grande perikolo para Israel’ dizen munchos analistos... Aktualmente, en este payis de superfisia tan chika, la diferensya ekonomika entre los rikos i los proves se esta desfortunadamente ancheando de ora en ora mas, la klasa sosyo-ekonomika medyana (ke lojikamente deve ser la klasa la mas ancha) pyedre kada dia de su volum inisyal de baza,
‘Esta situasyon es muy peligroza’ repetan varyos komentadores. Segun sus opinyon, una ekonomia sana repoza syempre sovre una importante klasa medyana, lakuala produze i en mizmo tyempo poseeda ansi un seguro poder de merkansia.
İ lo mas terrivle es ke kontinualmente la diferensya entre la klasa rika i la prove, aumente de una manera sorprendyente. El Estado Ebraiko pedrio ‘su ideal de igualidad i omojeneidad’ de los primeros tyempos, del de los Padres fundadores de Israel.
El Djudaizmo yeva en su fundamyentos el prinsipyo, si no de absoluta igualidad ekonomika entre todos los individuos, ma (a lo menos) de ‘una seguridad materyal para kada uno’ ke permetra a los ke apartyenen a la klasa flaka de defender sus derecho a la vida i a la dinyidad.
No son unikamente los preseptos rituelikos de baza ke azen la esensya de muestra relijyon, ma igualmente i mizmo prinsipalmente su maraviyoza Etika.
No mos olvidaremos las sublimes palavras ke la Bibla mos da por la boka del profeta Esai (58/6):
“El ayuno ke me plaze es: romper las kavenas de la indjustisya, dezatar las kuedras de todos los yugos i esklavajes, liberar todos los ke estan en la opresyon, partajar el pan kon los ke tyenen ambre, resivir en kaza los desmazalados sin avrigo, vestir los ke estan desnudos i nunka fuyir delantre una persona ke puedemos ayudar.
