Este teksto es el relato rezumado de las prinsipales peripesiyas de la vida de un grande savyo djudio
Moshe (Moises) ben Maimon, konosido komo Maimonides, nasyo el anyo 1135 en Cordoba. Aparteniya a una respektada famiya djudia, teniendo raizes en Yerushalayim de antes la “dispersyon” provokada por el Imperyo Romano. Su padre, Maimon ben Yosef, era djuzgador en el Tribunal Rabiniko de Cordoba.
Moises, desde su chikes, tuvo grande pasyon i entereso por los estudyos. Fue syempre apoyado por su padre i tambien por Yosef ben Migas, shefe de la importante eskola Talmudika de Lucena. Apenas teniya 16 anyos, kuando Moises ya era espesyalisto en filozofiya grega i araba. En desparte de ser un famozo pensador, fue tambien eskritor, matematisyen i mediko.
Myentres la Dominasyon Muzulmana, los sujetos de la Andaluziya (Endülüs) konosyeron una illimitada libertad de relijyon. Ma, en 1148 kon la invazyon de los Almohades, los djudios se toparon frente de dos alternativas: Konversyon al Islamismo o abandonar las tyerras ande biviyan. La famiya Maimon, kontinuo a pratikar en sekreto el judaismo durante 11 anyos. No ay indisyos siguros, no se save si la famiya de Maimonides fue ovligada a konvertirse al Islamismo.
Entervalo, munchos djudios fueron kondenados a muerte, kon el preteksto de aver kontinuado en sekreto la pratika de la Fey Ebraika. Entre otros, Rabbi Yehuda ben Shoshan, instruktor de Moises. Sovre esto, la famiya Maimon, realizando el peligro (perikolo) ke reprezentava para los djudios, bivir en estas tyerras, dechidaron de emigrar. En primero pasaron a Fez, sivdad del Maroko, en el Norte de la Afrika . Despues de poko tyempo se fueron a Palestina i finalmente a Misraim. Moises ampeso a lavorar komo mediko i gano grande fama. A tal grado ke, el poderozo Sultan Saladin Eyyubi lo nomino al posto de “Mediko ofisyel de la korte”, lo ke sinyifika, mediko del Palasyo.
Moshe ben Maimon konosido tambien komo el “Rambam”, era un grande eskrivano, un savyo. Entre sus importantes lavoros literaryos sovresalen dos de sus grande ovras. La “Mishne Tora” o (la repetisyon de la Ley). Eskrita en ebreo, entre los anyos 1170-1180, es un lavoro de 14 volumenes. El sigundo importante lavoro fue eskrito en arabo. Se treslado despues al ebreo komo “More Nevuhim” i tambien a la lingua Latina i diversas otras linguas.
Las “anchas” vizyones de Rambam, provoko kontra el, reaksyones negativas en los medios konservadores. A tel grado ke, El Rav de Montpellier ordeno de kemar en la Fransia entera todo el lavoro de Moshe. Portanto, la fama de Maimonides no amenguo. El fue konsiderado i achetado komo el mas grande pensador djudio. Fue tambien una de las bozes de la “Kreensa Tradisyonal Djudia”.
La ovra filozofika de Rambam tresladada a la lingua Latina, impresyono los eskrivanos komo Spinoza i Leibniz. En desparte, tiene konsideravle lavoros sovre la Medikeriya. Estos livros forman una partida de la İstoria de este ramo de la Sensya, de la Medikeriya.
Moises ben Maymon, el Rambam muryo en Ejipto el 20 de Tevet 1204 a la edad de 69 anyos. Su tomba ke se topa en Israel, en la sivdad de Tiberia, oy en diya es vijitada en tal ke un lugar sakro. La “Unesco” aviya deklarado 1985 komo anyo Mundial de Maimonides, en omenaje a este grande savyo “Universel”. En el proksimo teksto vamos a kontinuar kon el mizmo sujeto.
Sueto ke el anyo 2013 mos trayga la paz i la salud.
