Rabi Moshe ben Maimon (Maimonides), fue uno de los mas grandes savyos de todas las epokas. Durante su vida eskrivyo nombrozos livros en los kualos ekspliko las leyes i filozofiya de la Tora. Tambien era konosido i respektado komo mediko, filozofo i sientifiko. El Rambam nasyo en Cordoba i syendo manseviko, se mudo kon su famiya a Misraim, despues de pasar un syerto tyempo en Fez (Marruecos) i Palestina. Myentres su lavoro de estudyos de la Tora, no acheto dingun salaryo. Ansi se konsakro a la medikeriya para pueder mantener su famiya. Estuvo en la sima de su fama profesyonal, kuando fue nominado mediko personal del Palasyo del Sultan Aladin Eyyubi.
El Rambam, sintyendo su fin aserkar, demando ser enterrado en Tyerra de Israel. El 20 de Tevet 1204, muryo a la edad de 69 anyos. En Ejipto ande fue Gran Rabino, fue yorado por Djudios i Muzulmanos durante tres diyas. Tambien en la Tyerra Santa i el resto del mundo ande el Rambam aviya sido el giador de la “Juderia” mundial, fue komemorado kon sevisyos espesyal i ayunos (taanit).
Muncha djente de territorios leshanos vinyeron a Ejipto para asistir a los funerayes. Fue alora ke ampesaron las diskusyones sovre el lugar ande enterrar el Rambam. El ya es verdad ke aviya deshado de “sava” ser enterrado en Tyerra de Israel, ma no aviya mensyonado egzaktamente ke sivdad. A la segida de una seriya de diskusyones, kedaron de akordo sovre el transporto del serkolyo asta la frontiera de Israel. Ayi se iva tomar una desizyon.
El serkolyo byen dizpozado ensima de un gameyo, un kortej bastante grande se metyo al kamino. Todos estavan reselozos myentres el viyaje a traverso el dezyerto. Estavan konsyentes del peligro ke prezentava la banda de ladrones ke atakavan las “karavanas”. A poko poko empesando a eskureser, se apresuron, kon la esperansa de arrivar a un lugar mas siguro para pasar la nochada. En supeto sintyeron el grito del lider del grupo ke diziya: “Mos estan atakando!... Kada uno bushko un kanton para protejarse myentres ke otros kedaron al lado del serkolyo para kudyarlo.
Vyeron el shefe de los bandidos aserkarse del gameyo transportanto esta grande “kasha”, ke asigun el deviya kontener un trezoro. Mas kualo pudiya ser, vyendo ke tantas personas estavan teniendo kudyo grande. İzyeron lo ke izyeron los bandidos portanto nombrozos, ma no reusheron a pueder abashar la kasha muy pezgada. Alora dechidaron de tomar el gameyo kon la kasha endjuntos. I aki, otruna vez sus tentativas kedaron sin rezultado. El gameyo no se meneyo de su lugar... Ensanyado, el shefe de los bandidos ordeno de avrir la kasha.
Apenas uno de los ladrones aviya avrido el serkolyo, terrorizado, echo un grito terrivle:“Ay un puerpo en la kasha!” i se metyo a fuyir sin mirar atras... Tambien i los otros bandidos fuyeron, koryendo en medyo del dezyerto oskuro. El gameyo, entonses se meneyo, se alevanto al grande enkanto de los de la karavana i empeso a kaminar komo ke si teniya un buto prechizo, una direksyon de segir. Vyendo esto, el lider de la karavana ordeno de segir el gameyo. Era obviozo ke se estava indo verso la frontiera de Israel...
Todos lo sigieron, agora bien siguros del lugar ande estavan indo. Pasaron la frontiera de Israel, kontinuaron a viyajar. El gameyo entro a Tiberia, en el Norte del pais. Kontinuo a traverso las kalejas estrechas de la sivdad asta ke se areto i se arrodiyo sovre la tyerra. Todos los del grupo entendyeron ke este era el lugar ande devian enterrar el Rambam. Kon muncha prekosyon i kudyo tomaron el serkolyo densima el gameyo i lo pozaron enriva la tyerra. Empesaron a kavakar lo tomba. Todos los de ayi, fueron testigos de este estranyo evento i la maraviya ke tuvo lugar delantre de sus propios ojos.
Los abitantes de Tiberia konstruizeron una ermoza estruktura sovre el lugar ande fue enterrado el Rambam. Kada anyo, en el aniversaryo de su muerte, miles de personas de todas las partes del mundo vienen a vijitar su sakra tomba. El Talmud dize: “Ken yora en la tomba de una persona vertuoza, es igual a ken roga en el Sakro Templo”.
Manadero-Donde Sepultar el Rambam
