Derya Agiş, investigatora sovre mas de sukuenta branchas, aparejo un tesis de 168 ojas, en el ODTÜ (Middle East Technical University), sovre las mujeres volontarias (Pembe Melekler) del opital Or-Ahaim. En los dias ke pasimos, Agiş lo konvertio este tesis en un livro ‘Pink Angels: Cultural Reproduction through the Therapies Provided by a Jewish Women’s Organisation in Or-Ahaim Hospital in İstanbul’. En el ekstrakto, la investigatora rezumo el kontenido del livro:
‘Un grupo de mujeres judias en Estanbol estan serviendo los viejos en la unidad geriatriko del opital judiyo Or-Ahaim en Estanbol. Este grupo es nombrado komo ‘Pembe Melekler’. Las mujeres del opital fondaron un grupo de volontarias en el anyo 1974, i Nükhet Antebi les dio este nombre.
Este grupo de mujeres es divizado en tres subgrupos. Un grupo de mujeres azen konversasiones kon los viejos, i les azen terapias de arte. Un otro grupo les dan las komidas i los bevrajes, i en mezmo tiempo aparejan dulses, marmelades (ke se vende), i ofren servisios komemorativos. El treser grupo se okupan de todos estos echos.
Las mujeres del primer grupo ke son entrenadas komo terapistas de arte, avlan kon los viejos, les meldan teksos de livros sovre las diferentes kulturas del mundo, les ambezan a krear ovras de arte, i a kantar kantikas sovre diferentes okaziones kulturales, i kantikas ke tienen valores moral. A las vezes, les ambezan las valores moral de otros grupos relijiozos, las selebrasiones de las fiestas, i les kontan estorias de diferentes grupos. El objektivo es de prokurar la unidad en la diversidad, i de akodrarles ke kada uno de eyos son un miembro de la famiya de viejos en el opital.
Los djarros de dulses, i de marmelades, i los sestos de regalos, ke las mujeres aparejan, tienen enriva semboles judiyos i turkos..
Las mujeres volontarias empleyan semboles pozitivos en las terapias, i en las aktividades ke azen kon los viejos. Siempre se evita de avlar sovre sujetos negativos komo tristeza, o muerte. No solo las terapias, ma todas las aktividades tienen komo objekto, animarlos i darles alegriya, porke se sientan ke estan en sus kazas.
Los semboles, i las imajes metaforikas ke las terapistas empleyan, amostran los puntos komunes entre diferentes grupos relijiozos i etnikos, i ansi amostran la emportansa de la pas entre las personas.
Estas mujeres volontarias del opital Or-Ahaim, suivan las reglas del grupo, para ke los hazinos i los viejos se sientan repozados, i ke se konsientan ke estan en un lugar seriozo i seguro’.
