Es la data de la liberasyon del Kampo de Kosentrasyon Auschwitz, nombrado komo el “Kampo de la muerte”. Se eskrivyo muncho sovre la “Shoa”, se izo filmos, se izo i se esta azyendo oy en diya investigasyones en una kontinual bushkida de testimonyos de akeya epoka terrivle. Auschwitz es el simbolo de la grande trajediya del 20. Siglo, de la salvajeriya inumana ke nunka devemos olvidar.
El Sr.Ban Ki-moon, Sekretario Jeneral de las Nasyones Unidas, en el 27 Enero 2007, aviya echo esta deklarasyon:
“El Diya de Komemorasyon de las viktimas del Olokosto, es un diya importante del punto de vista de renovelar muestra fidelidad a los “Derechos del Ombre”. No es sufizyente de komemorar. Devemos tambien instruir las muevas jenerasyones sovre la sinyifikasyon de esta data, ambezerles su importansa istorika.
“En muestros diyas devemos akodrar i aplikar las lisyones ke tomimos del Olokosto. Devemos azer todo muestro posivle para pueder asigurar a toda la Umanidad sus derechos i valores reprezentadas por las Nasyones Unidas…”
Enero 2013… Aktualmente, keridos lektores, es ke puedemos afirmar ke todas las nasyones o, mas egzaktamente todos los puevlos estan en la kompleta posesyon de estas valores, de estos derechos?... Por siguro, esta pregunta areyeva munchas repuestas i komentaryos. Oy muestro sujeto es la Komemorasyon de una data importante, del 27 Enero 1945. Syendo ansi, kero transferar aki una partida de la emisyon ke la BBC aviya echo akel mizmo diya, dando una novela sansasyonel:
“27 ENERO 1945-diya de shabbat”
“Asigun importantes manaderos siguros, Auschwitz, el mas grande Kampo de Konsentrasyon Nazisto en Poloniya, fue oy demanyana reskapado (liberado) por las fuersas de la Armada Sovietika.
“Asigun las informasyones ke resivimos, syenes de miles djudios fueron tomados de diversos paises okupados por los nazistos. Yevados a este Kampo, fueron detenidos en kondisyones terrivle i eksterminados en las kamaretas de gaz.”
“Por la ora, no tenemos muncha enformasyon sovre la liberasyon del Kampo de Auschwitz. Syertos manaderos afirman ke los responsavles del kampo antes unas, kuantas semanas aviyan resivido el orden de destruir las kamaretas de gaz i los krematorios.Miles de detenidos en estado de pueder kaminar fueron yevados o embiyados a otros kampos, en el interior de la Alemanya.”
“Syertos detenidos reusheron a fuyir del Kampo de Auschwitz. Estos fujitivos dyeron enformasyones sovre lo ke estava pasando en el Kampo. Fueron tomadas tambien semejantes novelas de la parte del “Governo Polonezo en Egzilo” ke se topava en Londra.”
“Un grande shifro komo 400.000 djudios de la Ungariya eran embiyados kon treno a Poloniya, entasados unos sovre otros i despues transportados a Auschwitz. En el mez de Julio del anyo 1944 fue deskuvrido ke una partida enorme de estos dezmazalados djudios ungarezos aviyan sido eksterminados en las kamaretas de gaz.”
“Asigun el Ministeryo de Enformasyon Polonezo, las kamaretas de gaz puediyan tener la kapasidad de asfiksyar 6.000 personas al diya. Ansi, el diya del 27 Enero 1945, fueron los muy hazinos i los ke no tuvyeron la fuersa de abandonar el Kampo, ke arresivyeron las Fuersas Sovietikas.Varsovia, la Kapitala Poloneza fue liberada de una okupasyon de 5 anyos i medyo.”…
Auschwitz en el 27 Enero 1945 fue “salvado” por un grupo de soldados aparteniendo al 97. “Rejimento” de la Armada Sovietika. Anatoly Pavlovich Shapiro, el kapo del sovredicho rejimento konto el “azardo” ke akel diya los izo dirijar verso Auschwitz. Lo meldaremos en muestro proksimo teksto.
La Shoa es la salvajeriya del 20. Siglo. En metyendo el punto final a este teksto, kero repetar otruna vez estas palavras de muestra amiga Rachel Bortnick: “Kada uno de mozotros es un “sobrebiviente”…
A kontinuar...
