La muerte de Mişel Benrey fue para todos los ke lo konosiyan i partikularmente para su entorno immedyato: ija, ijo, inyetos, paryentes i amigos, un terrivle golpe emosyonal.
El venia muevamente de tornar de viaje de izmir ande avia ido kon un grupo de amigos pasar la nochada del pasaje al anyo 2013... i unos kuantos dias mas tadre, el tuvo un desrepozo al pareser no muy grave ke lo ovligo a ser hospitalizado. Lo saviyamos indispuesto, afektado de un medyano problema vaskular, ma a ningun momento en reziko de muerte. Kon su kavesa ke el syempre tenia alta, su torso derecho, su boz rezonante, el simbolizava para munchos de sus keridos: “La vigor fizika sostenida por una immensa fuersa moral”.
El okupo munchos postos importantes al seno de la kolektividad djudia de muestra sivdad, fue prezidente de una de muestras grandes asosyasyones kulturales i karitativas, a un syerto momento myembro aktivo del Konsilyo Laiko i de varyos otros sentros komunitaryos.
Su sensivilidad al malor de sus proksimos era muy grande; personalmente fui testiga (durante el tyempo de mi prezensya en el komite de la Matan Baseter) de kavzos a salvar en la kayades ke el mos sinyalava i a los kualos el kontribuiva syempre en silensyo.
Eramos muy serkanos, lo konosi desde su chikes en Kadiköy i malgrado ke el era muncho mas mansevo ke mi, kedimos muy amigos. No lo tengo nunka oido malavlar al sujeto de ken ke fuera, por kontra munchas vezes lo oyi dezir frankamente su deskontentes a la kara mizma de la persona a la kuala el tenia kualkyer koza a reproshar. Mişel era i kedo syempre el mizmo. Aunke muy serkano i muy komprensivle enverso su entorno, el era komo un bloke monolitiko echo de varyos prinsipyos de baza. Entre munchas de sus kualidades, las mas karakteristikas eran ‘su derechedad’ i su ‘profunda fidelidad a los preseptos de honestedad i de absoluta frankia’.
Su rekuerdo va kedar syempre prezente en la memorya de sus serkanos, kon grande tristeza byen entendido, i tambyen kon esta sensasyon de dulsor ke desha munchas vezes detras de eya, una grande amistad.
Ke su alma repoze en paz.
