Segun lo ke mos ambeza la prensa İsraelyana komo tambyen oksidental, el rezultado final de los partidos ke obtuvyeron lo mas de bozes en la eleksyon lejislativa Israelyana de martes el 22 del mez koryente es el sigyente:
31 Deputados: Likud de Netanyahu+ İsrael Beitenu
19 Deputados: Yesh Atid de Yair Lapid
15 Deputados: AVODA (Labour)
11 Deputados: Habayit Hayehudi (The Jewish home)
11 Deputados: Sepharadi Jewish Party
Esto mos da una mueva vizyon de los problemas i menesteres krusyales ansi ke de las verdaderas aspirasyones aktuales del puevlo Israelyano.
El primer partido viktoryozo kompuesto en realidad de dos koryentes nasyonales mas o menos diferentes, obtuvo 31 lugares en la Kneset İsraelyana, kuando se asperava 41... Deke este amenguamyento ke prova una deskontentes de la parte de munchos elektores?
La grande sorpreza fue el sugundo partido nombrado “Yesh Atid” (Ay un futuro) de Yair Lapid ke pudo a el solo obtener 19 lugares.-
En su Mayoria, este rezultado mos aze pensar ke oy en dia, para una partida de la populasyon Israelyana, no se trata unikamente de la sola seguridad del payis (lo ke absolutamente guadra su aktualidad i es inkontestavlemente de una importansa vital), ni tambyen del dezeo arkaiko de ‘un Grande Israel’ ke sera en su kompozisyon mizma, no solo un grande reziko para la seguridad del Payis, ma tambyen, en el futuro, un grande peligro identitaryo para el, komo lo sinyalo tan judisyozamente Tzipi Livni .
Paralelmente a este punto de vista ke me parese ser de una importansa mayor, aktualmente una de las preokupasyones lmperatlvas de Israel es el problema de la karestia de la vida (koste muy alto de la komanya kotidyana ansi ke del alojamyento (de las moradas) i tambyen de la edukasyon de los ninyos i adolesyentes, komparativamente al revenido de kada famiya ke se reduze kada dia mas en una grande parte del puevlo...
El programa de “Yesh Atid” (Ay un futuro) de Yair Lapid, mueva figura de la politika Israelyana, parese ser fraguado sovre estos problemas ke nesesitan: “un amenguamyento de la enorme diferensya ekonomika entre ’la klasa de los rikinyones’ i ‘la de los ke se topan debasho el umbral de la provedad”... “un enfortesimyento de la klasa medyana ke sera ansi una klasa aktiva, djeneradora de muevos empyegos”... “la reduksyon del koste de la komanya i de las moradas” i prinsipalmente, afin de asegurar un futuro briyante para Israel, “permeter ekonomikamente a kada famiya de dar a sus ijas i ijos una fuerte edukasyon eskolarya i universitarya.
El prekoniza tambyen ‘el dover de lavorar de todos los sitizanos relijyozos komo laikos’ ansi ke ‘el servisyo militar o sosyal para todos los jovenes sin distinksyon’.
Aunke partizano de la kreasyon de un Estado Palestinyano i de un retorno imminente a la meza de negosyasyones bilaterales , Yair Lapid no se atardo muncho sovre este tema, puedeser para afirmar en toda su vigor la importansa del faktor ekonomiko.
No savemos lo ke sera el futuro... munchas kozas dependen de los partenaryos ke Netanyahu eskojera.
