El anyo pasado me paso a la mano un teksto sovre Ester i par konsekuensa sovre la Fyesta de Purim. Lo guadri porke ya aviya pasado el diya de Purim. Akodrandome subitamente de akel artikolo enteresante i pensando ke eran los djustos diyas, kije azerlo konoser i a los lektores. Dunke, en eskrivyendo el teksto ke vash a meldar, kije aprovecharme de syertos pasajes del sovredicho artikolo sinyado “Eliezer Segal”. El esta abordando el sujeto de un punto de vista enteresante en su eskrita titolada “Esther the Marrano”.
El Livro de Ester no mos eksplika la razon de la insistensya de Mordehai keryendo ke Ester guadre del Rey Ahashverosh el sekreto de sus raizes djudias. El komentator del 12. Siglo, Rabbi Abraham Ben Ezra mos esta ekspozando su propia teoriya despues de analizar diversos komentaryos i diferentes faktos de su epoka:
“Mordehai kijo esto kon el eskopo de permeter a Ester de observar en sekreto la “Tora”i el “Shabbat” sin sentirse ovligada de partajar la komida “trefa”. En kavzo de la deskuvyerta de su Djudaizmo, o la ivan ovligar a trair su Fey o iva ser kondenada a murir ”.
Mizmo en el tyempo de Ben Ezra, se esta vyendo el estado de los djudios pratikando sus relijyon en sekreto i en un permanante espanto de ser deshifrados por los servitores. En los anyos medyanos del 12. Siglo, la Espanya i el Norte de la Afrika se topava debasho el reyno de la Dinastiya Muzulmana Fundemantalista “Mu’aha/din”. En akeya epoka tambien i ayi munchos djudios fueron forsados a konvertirsen al Islam. Fue myentres estos eventos ke la famiya “Maimonides” fuyeron de la Espanya al Ejipto. Komo savemos, Maimonides (Rambam) el propio eskrivyo una letra espesyal para giar i enkorajar los djudios enfrente de esta kriza.
Ben Ezra, kon su teoriya mos esta pushando a mirar de una ventana diferente sovre la situasyon bastante grave i prekarya en kuala se topava Ester. A la luz de su deskripsyon, estamos kontinuando: “Se esta vyendo dunke, munchas dekadas antes la Inkizisyon Kristiyana los djudios ke estan persekutidos de la mizma manera. Todos savemos muy bien komo eyos (los Marranos) guadraron i observaron el Judaizmo en sekreto, kuando fueron forsados a konvertirsen al Katolisizmo. Siguro, aviya un punto delikado. Mirando de la perspektiva de la “Halakha”, es difisil de justifikar el fenomen del “Marranismo”o el “Kripto-Djudaizmo”…
Komo lo afirmo syempre keridos lektores, en syertos kavzos no me syento el derecho de ekspozar una opinion personal, ni so kalifikada para esto. Kualos ke seyan los diversos puntos de vista sovre una “justifikasyon” o kontra, no puedemos portanto enyegar un fakto istoriko. Ester esta pratikando en sekreto su relijyon, en un entorno ajeno i sin piadad. Un estado asemejando de una manera inkreivle a la situasyon de las jenerasyones de “Conversos” espanyoles i portugezos, ke la Istorya iva ver mas tadre.
Es muy normal de pensar ke la Estorya de Ester fue syempre el favori manadero de inspirasyon para los djudios en difikultad, enfrente de un peligro.Esto mos esta apuntando el tradisyonal “Taanit” i no tanto la Fyesta eya propia. El Taanit ke es una importante indikasyon del Judaismo. Sovre esto meldaremos del teksto:
“El Kalendaryo Lunar Ebreo era inaksesivle a la mayoriya de los Djudios. La data del Taanit ansi ke todas las fyestas djudias eran kalkoladas asigun el Kalendaryo Kristiano i la Luna en 15 del mez de Febrero. Ansi, se puede dizir ke el ayuno fue el ritual relijyozo ke pudyeron observar los Marranos. Muncho mas ke el Purim el propio ke se deve fyestar kon rituales mas o menos vizivles, el Taanit se observa en silensyo i inaksyon. İ lo mas enteresante, el ayuno syendo una pratika favorita entre los Katolikos, los djudios pudyeron aplikarlo tambien en kada posivilidad ke toparon”.
La Estorya de Purim ke konosemos todos puede ser un giador para los ke biven en la Diaspora. En terminando kero transferar aki los byervos ke tomi de un artikolo sinyado Lesli Koppelman Ross: “El Livro de Ester esta ensenyando klaramente ke para pueder avansar en la vida profesyonal o politik, no tenemos el ovligo de abandonar muestra Identitad Djudia. Puedemos kedar un buen djudyo kreente todo en syendo reelmente un sujeto LEAL (fidel) a la Tyerra ke eskojimos de bivir”.
Sueto a todos amigos i lektores un Purim Alegre.
