Keridos Korelijionarios.
Este anyo tanbien selebramos el “Pesah” ke es la fiesta de libertad i ke nos apregona la primavera, djuntos nuestra famiya i nuestros serkanos komo kada anyo en plena prosperidad i alegriya todo en agradesyendo a El Altisimo Dyo ke nos eskapo del esklavadje de Ayifto.
Tanbien nos aderesamos verso El komo kada anyo i lo remersiamos en dizyendo:
“Baruh Şeeheyanu Vekiyemanu Veigianu Lazeman Aze”
Todo en konformandomos kon kudio a las reglas espesialas de alimento ordenadas por estos ocho diyas de “Pesah”.
Tanbien todo en aplikando las formalidades relidjiosas primordialas i nesesarias tenemos ke valorizar una otra vez el evenemento de “Pesah” siendo ke es el sentro dela kreensia i de la nasyonalidad djudia i en mezmo tiempo la baza fundamentala ke forma la idantidad djudia.
En nuestra Santa Tora ke nos alkanso asta oy sin ninguna modifikasion i ke guadrara su valor asta la eternidad sigıun nuestra kreensa el Santo i Bendicho El se denomina komo:
“Ani Ad. Aşer Otseti Ethem Meerets Mitsrayim / Yo So El Dyo ke Vos Kito De Tierra De Ayifto.”
Pienso ke tenemos de arivar a la realidad eskondida detras de estos biervos mezmo en las kondisiones aktualas.
Una de las bazas prensipalas de “Pesah” es:
“Meavdut Leherut Umişibud Ligeula / Del Esklavadje a la Libertad i del Kativeryo a la Salvasion”
Ke estos biervos no se enterpretan solo en senso fiziko, ke sino se deven de entender komo una modifikasion i reformasion en senso moral.
Pienso ke los biervos “libertad” i “salvasion” de una parte nos da a entender la salvasyon del individuo djudyo de sus kadenas pensativas i de otra parte nos ensenya de meternos en la pena de salvarnos del abizmo de de todo modo vanedad, neglidjensa i materializmo.
Pienso tanbien ke el modo el mas apropriado i siguro es el dependerse kon su propia veluntad a la disiplina djudia i afirmar sus preseptos i de transmeter nuestra kultura dizde kuarenta siglos a las nuevas djerenasiones.
Mirando de este punto de vista el:
“Veigadta Levinha / I Kontaras a tu ijo”
ke resitamos en la “Agada” i el testamento de Moşe Rabenu eskrita an la santa tora:
“Veşinantam LevanehaVedibarta Bam / I Ensenya a tus ijos Avlando de Esto”
kontienen un paralelizmo de alta konsiderasion.
Siendo yeno de estos pensamientos i sintimientos vos bendigo a todos vozotros kon todas las bendisiones de la Santa Tora i vos auguro un buen “Pesah” kon todos vuestros keridos i serkanos dentro union, salud, pas i prosperidad.
Hag Pesah Sameah
Moadim Lesimha
Rav İsak HALEVA
Gran Rabino
