Komo el mizmo lo avia deklarado antes de salir a viaje, Barack Obama no vijito Israel ni la Palestina para propozar kualkyer proyekto byen definido, ma simplemente para oir de las dos partes i entender antes de propozar i egzijir. En todo kavzo es la mano tendida kon amistad, ke el empeso i kloturo esta vijita...
Byen entendido nada fue realizado, se trato simplemente de un primer kontakto amigavle despues de una interrupsyon de mas de dos anyos de kualkyer esforso de negosyasyon, i sovre todo despues los regretavles mal entendidos ke akontesyeron, ay poko tyempo, entre el Prezidente de los Estados Unidos i el Primer Ministro Israelyano.
Esto dicho, Benyamin Natanyahu afirmo Myerkoles a Barack Obama ke su payis kontinua de dezear ‘la solusyon de dos estados’. El disho tekstualmente: “Israel keda atado a la solusyon de dos Estados para dos Puevlos. Tendemos una mano de paz i de amistad al Puevlo Palestinyano. Tengo la esperansa ke vuestra vijita i la del Sekretaryo de Estado John Kerry mos ayudaran a boltar la oja en muestras relasyones kon los Palestinyanos“
Las primeras palavras de Obama fueron, eyas, las sigyentes: ”Konsidero esta vijita komo la okazyon de reafirmar lo ke de una manera infayivle ata muestras dos nasyones la una a la otra i de formular de muevo el kudyo i el engajamyento permanente de los Estados Unidos por la seguridad de İsrael.... Semos syempre en djunto porke tenemos una mizma istorya, la istorya de patriotes desididos a bivir libres”.
I en ka konferensya de prensa ke el dyo kondjuntamente kon Mahmud Abbas, el deklaro: “Sovre baza de las konversasyones ke yo tuve kon el Primer Ministro Netanyahu i el Prezidente Abbas, yo penso ke la posivilidad de una solusyon a dos Estados kontinua a egzistir”
Esto ya fue dicho munchas vezes en el pasado sin nunka pueder ayegar a kualkyer konkluzyon definitiva ni mizmo envezes reflektar kualkyer intisyon sinsera, ma las mizmas palavras no tyenen syempre el mizmo senso; la signikikasyon real depende de las sirkunstansyas en laskualas eyas son formuladas…. Esta vez, despues la chika o grande diverjensya de opinyon ke uvo en un pasado ainda resyente entre Obama i Netanyahu, eyas toman un senso diferente i paresen mizmo ser komo la afirmasyon de un dezeo fuerte de las dos partes.
Ansi eyas devyenen: “Palavras ke nunka, asta estos dias, fueron pronunsyadas kon la mizma insistensya’’ i ke paresen komo unos primeros jalones de voluntad de komprensyon en un espasyo yeno de punchones.,..En todo kavzo el objetivo no era de konkluir, ma simplemente de manifestar ke se dezea syempre reempesar kon o sin esperansa un muevo kontakto, i esto no es poko.
Munchos grandes komentadores politikos ekspresan sus septisizmo al sujeto de una posibilidad de reushita .... rasyonalmente tyenen probablemente razon, ay multiples entrompyesos a venser antes de pueder ayegar a una realizasyon ke sera verdadera i no problematika i sometida al hazardo de faktores imprevizivles. Lo importante oy es de kerer kontinuar la lucha.
Esta vijita es puede ser una simple operasyon diplomatika, ma tambyen un sinyo de real buena veluntad, lo ke es la koza de lakuala (oy en dia) se tyene lo mas menester...
