Eske en la vertijinoza evolusyon sosyal i syentifika aktual, el konsepto de la famiya puedra guadrar su perenidad ansestral?
Desde unos kuantos mezes, komo fue tambyen anteryoramente el kavzo por otros payis oksidentales, el Puevlo Fransez se topa en un estado de grande polemika entre sus myembros, al sujeto de los kazamyentos homoseksuales
Aunke semos ajenos a semejantes problemas, una kestyon inevitavlemente mos vyene al tino: “Ke devyendra la famiya? o para ser mas prechiza ke sera el konsepto de la famiya en un futuro serkano o leshano?”
Aktualmente, munchos payizes Evropeos I nombrozos estados de la Amerika del Norte akseptaron el kazamyento ofisyal entre homoseksuales, lo ke en realidad es una aliansa entre dos personas ke se aman i keren aunar sus vidas, dezeo ke (asta un syerto grado) puede ser konsiderado komo un derecho natural de kada persona.
La homoseksualidad prohibida syempre en las relijyones monoteistas, era tambyen objeto de verguensa en la sosyedad sivil asta una epoka kaji resyente, ma desde unos kuantos anyos, eya es avyertamente akseptada al nivel sosyal de la parte de muchos payizes ke tyenen una konstitusyon demokratika, i esto sovre baza del prinsipyo de ‘absoluta libertad’ de kada individuo, todo el tyempo ke esta libertad no konstitue un impedimyento a la de los otros.
En el mundo Oksidental layik, la unyon de dos homoseksuales no es mas konsiderada komo un oprobyo, ni komo un fakto dezonorante, ma simplemente komo una relasyon seksual normal entre personas konkriadas kon pulsyone diferentes.
Sovre este sujeto egziste mizmo un konsensus jeneral en la populasyon laika. El Prezidente de los Estados Unidos formulo, el mizmo, su respekto por kualkyer minoridad, kualas sean sus partikularidades, tanto ke eyas no konstituen un sujeto de danyo para sus deredor.
Ma la situasyon troka kuando se trata de la revendikasyon de filyasyon i del dezeo de los homoseksuales (ombres komo mujeres) de krear una famiya kon ninyos adoptados o konsevidos segun muevas metodes medikales.
Ke sera la estruktura de este djenero de famiyas ovligatoryamente diferentes de la mayoria de las otras? Eske “dos ombres” o “dos mujeres” puedran dar a un ninyo lo ke da el grupo klasiko de paryentes kompuesto de un ombre i una mujer?
Desde los primeros tyempos de la humanidad, los myembros dirijentes de una famiya selular (madre, padre i ninyos) tyenen por sus kreaturas un sentimyento de kerensya empapada en mizmo tyempo de otoridad i de kudyo, ke kada uno de entre eyos ekspresa kon su propyo potensyal afektivo, relativamente al sekso al kual el apartyene.
El ninyo tyene menester de estas dos otoridades ke son diferentes la una de la otra todo en tenyendo el mizmo objetivo, lo ke asta oy aseguro la perenidad de la selula familyal, baza fundamental de lo ke yamamos ’la humanidad’.
Ke sera en el futuro el destino de estos ninyos adoptados o konkriados por dos ombres o dos mujeres i no por una mujer djunto kon un ombre, kada uno kon la rikeza de su sensibilidad?
