Este teksto es un chiko rezumen de mi lavoro titolado “Hotel Meina”, publikado en el No.95 de “El Amaneser”. Teksto amostrando una facha de la salvajeria nazista, poko konosida asta antes poko tyempo: “La Shoa en İtalia”.
El lavoro orijinal ke tresladi al Judeo-Espanyol para muestra revista, fue el rezultado de las bushkidades intensas de Metin Delevi influensado i tambien intrigado de una fraza del kapitolo “Djudios de Turkiya en İtalia” (p.463-480) del livro “ TURKİYA, DJUDİOS i HOLOKOSTO”, eskrito por la Sra. Corry Guttstdat.
En el “Centro di Documantazione Ebraika Contempoarana” (CDEC) de Milano, se topan las arshivas de la Shoa. Ansi, mos ambezamos ke el Sr. Nebil Fuat Ertok, Konsul Turko en Milano a la epoka, reusho a salvar munchos djudios de sujesyon turka. Esto, al grado mizmo de amenazar las otoridades nazistas. Aki repuesta ke arresivyo M. Delevi kuando se adereso a el “CDEC”:
“Bazandomos sovre las atestasyones de la Sra. Becky Behar, ija del Sr. Alberto Behar proprietario del “Hotel Meina”, el Otel fue empleado komo prezyon para los djudios en posesyon de pasaporto italyano i arrivados de Salonika. En el Septembre del 1943, estas famiyas fueron eksterminadas de manera atrosa.
“La famiya Behar, grasyas a sus pasaporto turko salvaron de la muerte, komo fue el kavzo de nombrozos djudios de la Evropa, syendo ke la Turkiya era “Neutre” a la epoka. Ay munchas probabilidades ke, kon la intervansyon del Sr. Ertok, la famiya Behar kedo en vida grasyas a la “politika”etranyera de la Alemanya.
“Liliana Picciote” (Dirijente del CDEC)”
Meina es una agradavle rejyon kampanyarda en Piemonte, al bodre del Lago Maggiore, donde el norte apartiene a la Suissa i el Sud a la İtalia. Esta rejyon i espesyalmente el Hotel Meina fueron testigos de una trajediya kompletamente inyorada de la parte de muncha djente. Fueron testigos del primer “Génocide” djudio en la İtalia.
Ya savemos ke los djudios, desde siglos estuvyeron bivyendo en diferentes rejyones de la İtalia. Kon tyempo se adjuntaron a eyos otros djudios arrondjados de sus tyerras. Uvo periodas ke bivyeron en “Gettos”. Portanto no akontesyo grande problemas i se puede mizmo dizir ke estuvyeron en buena armoniya kon la Komunidad İtaliana.
Ma, las kozas ampesaron a trokar kon la aliansa Mussolini-Hitler. En 1938, sigiendo las leyes “Anti-Djudias”, se esta vyendo sus aplikasyones, komo publikasyones antisemitas, anulasyon de derechos fundamentales de los djudios ets… Malgrado todas estas “mezuras nazistas”, los djudios asta el Septembre 1943, no fueron viktimas de dinguna agresyon fizika en İtalia. En Julio 1943 la situasyon troko. Sigiendo una seriya de eventos politik i militar, se puede afirmar ke, entonses no iva aver dingun impedimiento delantre la “Makina de la Muerte” de los nazistos. Aki syertos detalyos, de la boka de Becky Behar, aedada de 14 anyos a la epoka:
“Los djudios italyanos fueron entuzyazmados del pakto de “Tregua” del 8 Septembre. Par kontra, los djudios fuidos de Salonika estavan siguros ke los alemanes no ivan a kedar espektatores delantre del evento. Savyendo muy bien lo ke aviyan bivido mas antes estavan septikos. Efektivamente sus reselo no era sin razon… Un grupo de Komando el “SS Leibstandarte Adolf Hitler” arrivando en la demanyana del 11 Septembre, organizo un atako al Hotel Meina.”…
En la nochada del 22 Septembre 12 djudios detenidos en el Otel, fueron yevados por este grupo a un lugar deskonosido. A la demanyana, en la rejyon i en el Otel tambien, uvo rumores terrivles, konsernando los kuerpos kitados del fondo del Lago i identifikados komo ser los malorozos detenidos del Otel. Todos matados kon plomo o metodas atrosas i deshados al dip del Lago, pyedras atadas al garon…La noche del 23 Septembre, 4 otros dezmazalados, donde 2 kriaturas konosyeron la mizma suerte.
Finalmente, el 11 de Oktobre el grupo de Komandos abandono la rejyon deshando detras 57 viktimas djudias “identifikadas”. A la Shoa de İtalia empesada por los nazistos el 15 del Septembre 1943 en el bodre del Lago Maggiore los djudios, asta la fin de la Gerra dyeron 7.500 viktimas. Malorozamente, malgrado syertos djuzgos o tentativas de djuzgos, no se tomo dingun rezultado. Ansi, la Shoa del Lago Maggiore kedo sin kastigo i kon tyempo ampeso a ser olvidada…
