Ninet Bivas
Alhad pasado 7 nisan tuvimos en la eskola Ulus un diya de konferensyas por darsanes etranjeros i lokal. El evenimyento yamado “70 Pencere” (Şevim Panim La Tora) empeso a las 11 de la demanyana i kontinuo fista las 6 de la tadre. Los sujetos eran: Kualo es el sekreto de un kazamyento orozo? Komo topar la felisidad? Ya tenemos la felisidad aryento de mozotros?
En edukando muestras kreaturas komo anbezarles? Los organizatores salyeron de las kestyones ke teniyan i bushkaron las repuestas en el Judaizmo en el kual nasimos.
Aki el rezumen de dos koferensyas a las kualas partisipi.
La konferensya del Rav Shais Taub Professor del mistisizmo Judyo: Konsyensya sentimental.
Kale profitar de todos los momentos de la vida. Mizmo en los diyas de difikultad kale sintir la prezensya del Dyo al lado de mozotros.
Ay tres kozas ke no puedemos trokar en la vida; Lo Pasado, La Realidad i el de enfrente. Kuando te sientes inyervozo es ke keres trokar una de estas tres kozas. Si keremos trokar las kozas ke estan ahuera de muestra veluntad es una peryita de tyempo i de enerjiya. Komo 2+2=4 es la realidad todo es en el pueder del Dyo. Devemos konsantrarmos en las kozas ke puedemos azer. Si vos aleshash de la realidad no puedesh bivir vuestra vida. Si inyegash la realidad deve dizir ke refuzash el Dyo ke izo esta realidad.
Kol akoes keilu oved avoda zara. Todos los ke se inyervan son komo ke izyeran avoda zara.
Para ser sanos de neshama kale ser orozos kon lo ke izo el Dyo para la realidad. Estaremos parte de la realidad. No estaremos parte del espanto, inyervo i ansya. Si lo azemos, la trankilidad i el repozo seran kon mozotros.
La Konferensya de Lori Palatnik: Enamorarse i kedar amorozo es una illuziyon?
En muestra epoka el 50% de los mansevos kazados estan divorsando. Entre los ke no divorsaron la meatad estan bivyendo orozos. Una de las mas importantes desiziones de muestra vida es de eskojer su kompanyero(eş); los evenimyentos siguentes: kreaturas, karier, lavoro todo depende de esto. Tomaremos en konsiderasyon unos espozos ke estan en kamino de kazar. Les daremos a kada uno un papel i les demandaremos ke mos den la definisyon del amor i del kazamyento. Kuando komparamos el rezultado vemos ke moz dan dos definisyones diferentes. En avlando del amor i del kazamyento no puedemos komparar el amor de los primeros diyas kon el amor de 25 anyos despuez. El ombre i la mujer son komo los dos pedasos de un pazıl ke se va unirse perfektamente. Unas personas son ordonadas i henozas; i la mas parte son dezordenadas. Una persona ke es egzaktamente del mizmo karakter del otro forman endjuntos doz vezes el mizmo karakter. Devemos abrasar la diferensya. Devemos ser pasensyozos, yenos de entendimyento i yenos de kerensya. La definisyon de la kerensya i amor es: Konsantrarse en la buena parte de una otra persona. El amor es una preferensya; kada diya, ora i minuto konsantrarse en la buena parte del diferente. Ya savesh el lado malo ma vos konsantrash en lo bueno. Kada uno tyene su validja ke traye endjuntos i la avre. El amor: Lo ke es emportante para mi es importante i para ti, i el kontraryo.
En dando mas muncho se ama mas. No refuzes de tomar; Las chikas kozas tyenen una valor grande.
Tenesh los mizmos butos? Estash partajando las mizmas valores? En avlando del fizik tenesh atraksyon de parte i de otra? Es muy emportante. En konosyendo mas se ama mas. Una eksepsyon por las mujeres. En konosyendo si topan ke es bovo ya es la fin de la amistad. El respekto tanbien es emportante. El marido puede ser el dirijente de una grande firma, ma kuando viene a kaza si no ve respekto de su mujer es el empesijo de la fin. Las mujeres tyenen menester de saver ke ya la keren muncho bien. El dever de los ombres es de azer las mujeres orozas. Mezmo si vuestro marido izo un yerro no le digash. Kale komportarse kon entelijensya para el kazamyento orozo.
