La prensa franseza i la İsraelyana mos ambezaron la semana pasada ke la komunidad djudia de Fransya (una de las mas grandes de la Diaspora despues de la Amerikana) se topa aktualmente en un estado de sorpreza doloroza, ferida en su sensivilidad i despedasada en su omojeneidad, a la sigida de las akuzasyones malorozamente djustifikadas ke eskuresen la fama de su Giador espiritual Gilles Bernheim.
Asta este ultimo evenemento, el Gran Rabino de Fransya era kaji unanimamente konsiderado komo un ombre de una kultura superyor i de una integridad moral absoluta, no solo de parte de la mayoria de los myembros de su komunidad ma tambyen de parte de munchos grandes prelatos Kristyanos i varyos relijyozos Muzulmanos.
El bushko syempre el dialogo kon las otras Kreensas Monoteistas, todo en mantenyendo de una manera estrikta su fidelidad i su obedyensa a los prinsipyos fundamentales del djudaizmo.
En el terrivle kavzo de la muerte de 4 djudyos salvajemente matados el anyo pasado en Toulouse, Gilles Bernheim se plaso al lado de los leaders muzulmanos para afirmar kon fuersa su refuzo de un kualkyer amalgamo entre ‘Djihadizmo’ i ‘Islam’…
Desde el empesijo de su mandato, los enkontros amigavles i konstrutivos entre grandes İmames muzulmanos, eklezyastos Kristyanos i responsavles djudyos devinyeron de mas a mas frekuentes en Fransya, sinyifikando ke un grande paso evolutivo era echo en el espasyo de una mizma bushkida de humanismo ke tendra komo baza ‘la akseptasyon del otro’, punto kulminante de todo modo de Fey realmente monoteista.
En el anyo 2008, fue editado un livro entitolado ‘Le Rabbin et le Cardinal‘ rezultado de una serie de dialogos amigavles i muy pozitivos entre el kardinal Barbarin (biskopos de Lyon) i el Gran Rabino Gilles Bernheim.
Ma oy este grande Relijyozo djudyo ke en su funksyon supo ir asta ‘la esensya verdadera i no simplemente literal’ de los tekstos ansyanos… este ombre ke bushko no solo lo ke desferensya las varyas kreensas monoteistas, ma lo ke las aserka… este giador ke egzijo de los futuros kandidatos a las funksyones rabinikas, de poseder no solo un diploma de seminaryo hasidik, ma tambyen una lesensya de filozofia jeneral afin (se puede pensar) de tener una mirada mas ancha en sus djuzgamyento i ke realizo ansi un desvelopamyento de la vizyon djudia…este ombre se topa oy en dia en el ovligo de prezentar su demisyon, akulpado de plajyo por aver enrikesido sus propyos tekstos kon paragrafos ke apartyenen a otros eskritores sin deklarar el nombre del autor real, i tambyen el es aktualmente akulpado de aver uzurpado el titolo de ‘agregado de filozofia’, una distinksyon ke el nunka pudo obtener .
Estas kulpas son inkontestavlemente grandes i konsideradas komo ‘rovo’ i uzurpasyon, lo ke parese inkonsevable de la parte de un grande Shefe relijyozo de su dimensyon.
Ansi el se topo ovligado de demisyonar aunke durante su funksyon, el izo prova de dos kualidades superyores ke raramente egzisten simultaneamente en la mizma persona:’’una fidelidad eskrupuloza a los preseptos de su fey i en mizmo tyempo una manyifika avyertura a las valores de otras relijyones…
Segun lo ke la djornalista Stephanie Le Bars mos dize ’’El Vatican deklaro konservar syempre su estima por las ovras del Gran Rabino Gilles Bernheim malgrado los emprestimos ke el pudo azer a tekstos de autores katolikos en su ‘deklarasyon kontra el kazamyento homoseksual’ publikada en el mez de desembre 2012 , deklarasyon saludada kon entuzyasmo de parte del Papa de akeya data Benedictus XVI”.
Una kestyon kedara por un largo tyempo en el esprito de muncha djente: ’’Deke Gilles Bernheim, ombre konsiderado komo una persona de grande refleksyon i tambyen ombre de relijyon ke supo meter en relieve la alta etika djudia, pudo perpetrar este akto de plajyo i de frustasyon? El no pudia inyorar la gravidad de estos dos delitos kontraryos a la moralidad.
Deke, “el” ke ya avia ayegado al punto kulminante de su karera i ke gozava de la apresyasyon de todos , metyo en peligro la esensya mizma de su ideal espiritual, el kual repoza sovre el ‘respekto del otro, en su Ser i su Byen’?
Es ke este grande Ombre de Ley perpetro estas kulpas konsyentemente, pushado por la vanidad? o puede ser (lo kero pensar) inkonsyentemente, a la sigida de una serie de neglijensyas?.
Un grande filozofo del kual no me akodro el nombre, avia dicho: “el ombre se topa perpetualmente en un espasyo de insertidumbre entre el ‘infinito’ i ‘nada’.
