Una Leyenda
Kalba Sabua grande senyor en Yerushalayim, posedava trupas de kodreros i nombrozos pastores. Entre eyos, Akiva se remarkava por su piadad i komporto korekto. A la edad de 40, era dayinda servidor fidel de Sabua. Un diya Rahel, la ija del patron, renomada por sus vertudes le disho: “Akiva, te vo azer una propozisyon . Si achetas de konsakrarte enteramente al estudyo de la TORA, esto pronta a kazarme kon ti”. Akiva syempre teniya el suenyo de azerse grande Haham. Es ke estava serka de alkansar a este dezeo?. Entuzyazmado apenas topo fuersa de avlar: “Estudyar? Es mi grande dezeo. Ma, yo no me syento dinyo de ti”.
La vertuoza Rahel respondyo ke si estudyava la TORA, el seriya dinyo de kazarse kon eya. Los dos mansevos se espozaron en sekreto. El padre lo supo i se ensanyo terrivlamente.. Kualo!? La ija regalada del mas riko del pais, iva tomar por marido un prove pastor!.. Enfrente la ferma rezolusyon de Rahel, el padre kon birra, djuro de deskonoserla komo su eredadera. De esta manera, Rahel iva kedar toda su vida la mujer del mizeravle pastor, arrondjados de kaza. Los mansevos se kazaron en kompleta mizerya. Posedavan solo una desmazalada “kuliba” por abrigo i durmiyan ensima pajas. Syempre ke Akiva diziya ser el responsavle de esto, Rahel eya respondiya ke las rikezas terrestras no le entresavan, a la kontra las desdenyava. Era por el amor de la TORA ke aviya segido Akiva. Ansi Rahel iva afalagando su marido.
Un diya, el Profeta Eliau Anavi, degizado en sedakero, se aserko de eyos demandoles piadad para su kriatura hazina. Disho ser muy prove al grado de no tener ni paja para echarlo. Akiva, de vista tomo de la paja de su lecho para dar al estranyero, dizyendo a Rahel ke aviya mas proves ke eyos. Los diyas pasando, pensaron bushkar eskola, ande Akiva podriya ambezar la TORA. “No tornes sin devenir un maestro, un savyo en Israel” le enkomendo Rahel, asigurando su marido ke el Grande Piadozo no la iva abandonar. Eya estava tan sigura ke malgrado su ezitasyon Akiva acheto de partir.
Durante 12 anyos estudyo kon sukseso en las eskolas de Rabbi Eliezer i Rabbi Yoshua Ben Hananiah. Ansi, meresyo ser klasado al rango de los Hahamim i savyos de Israel. Vino el momento de topar Rahel. Kon grande emosyon arrivo delantre su kuliba. Se enkanto de oyir la boz de su mujer i una boz de ombre, boz ajena:
“Tus paryentes teniyan razon de echarte de kaza. Kijites un ombre indinyo ke te abandono i anyos no dyo dinguna novela”. Rahel respondyo ke djuntos aviyan dechidado ansi kon Akiva. Si aviya menester, oy mizmo le konsejariya de kedar otros muevos dodje anyos, asta ke se seyga el propyo, una luz de Israel.
Akiva, sintyendo estos byervos se le lagrimeyaron los ojos. Sin entrar partyo para retornar a sus maestros. Este eroismo, solo el Todo Poderozo fue testigo. A la fin de otros 12 anyos, Akiva alkanso a una grande nombradiya. Torno a su pais tenyendo vente i kuatro mil elevos de todas las partes de la rejyon. Entre el puevlo ke koryo para ver el ilustro doktor aviya una mujer de vista mizeravle. Se aserko de Akiva para endcinoyarse. Los dishiplos keryendo arrondjarla, el savyo les disho: “Deshaldad! si semos oy lo ke semos, saveldo ke lo devemos a eya”.
Los elevos entendyeron. Kon respekto se enkorvaron delantre Rahel. Kalba Sabua, vyendo esto se sintyo orgolyozo de posedar tal yerno. Lo arresivyo kon todas las onores i se dezato de la djura ke aviya echo antes munchos anyos. Desho su imensa fortuna a su ija Rahel. Fue entonses ke la boda de Akiva i Rahel, se selebro kon grande fyestas. Nunka kazamyento konosyo semejante esplendor. Se selebro tambyen, la glorya de la Ley Divina, a kuala todos los dos se aviyan konsakrado kon eroismo.
Adaptado de: Contes et
Légendes d’Israel- A. Weil.
