Setenta karas de la Tora

“SETENTA KARAS DE LA TORA” es un festival de kultura ke se organizo en 07.04.2013 en la eskola “Ulus Musevi Lisesi” en Estambol.

Es la primera ves ke se organizo en una manera perfekta, en reushendo a trayer personas, profesores de grande valor, Raves emportantes en sus espasyos i dando la emportansa menesteroza a todos los detalyos.

Fue komo un “LİMMUD” ke se organiza kada anyo kon grande reushitad.

 La sinyifikasyon de “Limmud” es; ambezar, estudyar. El buto es; ambezar kon la partisipasyon de la persona, i dar la okazyon de developar muestra identitad.

Las konferensyas de “Setenta Karas de la Tora” ambezo a los partisipantes a partajar la konosensya para developar la identitad djudiya i arrezyar (güçlendirmek) muestra kultura.

“Rav David AARON” ke es un grande eskrivano konosido en el mundo entero avlo sovre los sujetos;

- Kualo es el buto de la persona en la vida?

- Kualo es el sekreto de renuvelar (yenilemek) muestra emosyon (heyecan) la fuersa de pueder kontinuar muestra vida kada dia?

- El konsepto del todo el Puederoso…

Fue una avla muy enteresante i mos aklaro sovre estos sujetos.

“Lori PALATNİK” mujer kultivada ke avla sovre los sujetos de kada dia de las mujeres, topa solusyones kreativos (yaratıcı) para rezolver los problemes.

Unos kuantos pasajes de lo ke avlo kon grande entuzyasmo.

- Kon ken te keriyas kazar?

- Kual es el echo ideal para ti?

- Deke estas kontraryando tus kriyaturas?

- Kualo puedes azer para arivar a tu potansyel?

Oras de midi, una organizasyon ekstraordinarya de Barınyurt para komer salatas i sandviches diferentes, dulsuryas, frutas, bevyentas i otras kozas.

 Despues de midi, la primera konferensya fue:

“La reushitad en la felisitad” (mutlulukta başarı).

Rav David Aaron ampeso kon la demanda:

“Ken so yo? Kerer a si mizmo (kendini sevmek) es el byervo komo la yave (anahtar) ke avre la puerta.

Kale ke eskojemos lo ke somos.(kim olduğumuzu seçmeliyiz) i mirar komo puedemos ayudar a este mundo. En dando kerensya al den frente, en ayudando los ke estan en oras malas, los aedados, los mansevos.

Topar melizina a los hazinos, okuparmos de los asolados i munchas otras kozas”.

 A la fin “David WEISS” el senaristo konosido en el mundo entero partajo kon mozotros las eksperyensas (deneyim) enteresantes de su vida.

- Kualos son los sekretos de la reushitad sin peryer su identitad?

El partajo sus sentimyentos en kontando su vida de lavoro komo un relijyozo en Hollywood.

El Hazan “Simon Cohen” kon su boz maraviyoza dyo un konserto inolvidavle.

Fue un dia yeno de saveduria (bilgi), byen organizado, kon muncha djente, i muy reushido.

Kero felisitar a todos los ke lavoraron de alma i korason, kon grande veluntad para esta grande organizasyon.

Fueron kapaches i muy mitikulozos (özenli) para elijir (seçmek), los Raves etranjeros envitados; para resivirlos i okuparsen tres kuatro dias kon eyos fina sus partensyas.