Shangai es una de las mas aktivas sivdades del mundo. En el kuatro de Avril, esta sivdad testimonio al renasimiento del judaizmo en la rejion.
Esta sivdad istorika, i yena de istoria judiya, sevio komo egzamplio a las muevas komunidades judiyas de Asia. La aktividad ke empeso en el kuatro de Avril, fue nombrada komo Destino Shangai. Destino Shangai fue una selebrasion de kuatro diyas ke tiene la sinyifikasion de ‘Ser judio en Asia’.
Setenta anyos antes, Shangai fue el refujio de miles de judios: rusos, sefaradis, i judios ke fuyeron de las matansinas de los Nazis. Ma, oy, kon esta aktividad, Shangai reusho a reunir los kontemperanos lideres judios de Asia, para konstruir una identidad, i una komunidad judiya ke va ser solo suyas.
Oy, en Asia, muevas komunidades judiyas estan nasiendo, i estan bushkando muevas formas de eksprimar el judaizmo. Esta populasion mesklada de todo modo de grupos judios, se esta aprovechando de los benefitos de los marketes global, i esta enrikesiendo la pratika judiya i la komunidad lokal.
Una variedad de grupos judios estan kontribuando a este fenomen. El anyo ke pasimos, por egzamplio, JDC (American Jewish Joint Contribution Commitee), i Limmud İnternational, lavoraron kon los judios lokal (ke estan ekspatriados) para organizar un evento: Limmud en la China.
Los volontarios de Shangai, Bejing, Mumbai, i Singapur, lavoraron endjuntos en esta aktividad. Mas de sien personas ke no avian oyido avlar de Limmud fin akel diya, organizaron la aktividad, Limmud Hong Kong.
Este anyo, el mezmo ekipo formaron un grupo de volontarios ke dieron sus tiempo i enerjiya a esta aktividad. Un reprezantante de la JDC, los yevo a un nivo mas alto, i aparejaron el plan del program. Los partisipantes asistieron a la reunion, i antes de todo, komemoraron el setentien aniverserio del geto de Hong Kong, ande mas de 15.000 refujiados judios bivieron lado kon lado kon sus vizinos chinos. Por aprovechar de la kreatividad del pasado, emprimero egzaminaron el pasado, duspues, se fokusaron a la responsabilidad judiya mondial, i espesialamente a las komunidades ekspatriadas de Asia. Dieron lekturas, aparejaron workshopes, paneles, diskusiones, i entrevistas en la sena.
Esta aktividad, de una parte, fue enteramente kosher para garantizar tambien la partisipasion de los ortodokses, i de otra parte, fue komo un ‘viaje judio’ por ke todos los judios vengan, i se aprovechen de la saverisia judiya.
Fue los volontarios ke aparejaron el evento entero . Ser volontario permete de apropriarsen del proseso, i ansi, de fortalesar la koneksion kon el judiazmo, i kon sus komunidad.
El Destino Shangai, tambien ayudo a topar solusiones a las problemas, i a krear una eksperiensia ke va servir a unir los judios de diferentes grupos endjuntos.
