Antes dyes dias tuvimos una shans mirakuloza de ganar dos bilyetos de iyir i vinir a İsrael; en una nochada de una organizasyon ke alkilo un avyon para un torno (tur) organizado de sinko dias para syen personas.
Kero remersyar el presidente kon su ekipa i la kerida ermana ke topo muestro numero en la loteria de esta organizasyon.
Fue un sonyo para mi marido i yo de pueder vijitar toda muestra famiya, tiyos, tiyas, primos, primas, amigos de antes kuarenta anyos, i de pueder ver las maraviyas de este pais Santo adelantado en todo modo punto de vista.
El primer dia despues de un viaje repozado i sin tadrar arivimos al aeroporto Ben Gurion.
Miz dos primas vinyeron a arisivirmos i mos fuimos ande mi prima chika para kedarmos aya.
Bezos, abrasos, kon los maridos i sus kriyaturas.
Una risivida muy kayente i yena de amor.
Tener famiya i ser kerensyozos i serka los unos kon los otros; es una shans a parte mizmo si se bive en paises diferentes. La distansya (mesafe) no es un problem si se kere byen.
Enfin, el sigundo dia organizaron un viaje a “Sfat” ke se topa al norte del pais.
Mi primo a las sej de la demanyana mos yevo al otobus, i aya mos konosimos kon trenta turkos ke biven agora en İsrael, todos muy sempatikos.
Muestra primera stasyon (durak) fue la fakulta de medikeria (tıp fakültesi) de la famosa universitad de “Bar-İlan” ke se konstruizo muevamente en esta sivdad.
Mos konosimos kon uno de los grandes donatores i ke esta en la delegasyon de dirijentes (yönetici heyeti) de esta Universitad ;
“Naile i Selim SALTİ” ke organizaron esta reunyon para azermos konoser las investigasyones (araştırma) ke se esta azyendo aki, i los laboratoryos (laboratuar) ande se esta bushkando las melizinas de las hazinuras maldichas komo el kanser por egzempyo ke esta el landre (veba) de este syeklo.
Profesores i profesoras mansevos del mundo entero, prezentaron kon un filmo las novedades (yenilik) ke estan topando i avlaron sovre el avenir (gelecek). El Dyo ke los emprezente, komo de intelijensya, komo de saverisyo!.....
Todos muy enteresados fuimos muy kontentes de esta vijita ke mos dyo una idea de las maraviyas de este pais. Guadrados de ojo malo i de selo!....
El buto de konstruizarse de esta fakulta en “Sfat” ke es en “Galile”; es de pueder edukar doktores, elevos ke van a azer bushkidades i ombres de sensya (bilim) para pueder abasteser a los onze ospitales (hastane) ke ay en el entorno de esta sivdad.
La “Fondasyon Salti” (Salti Vakfı), es un establisimyento (kurum) ke la famiya Salti la fondyo ay trenta anyos ke da burses a los elevos İsraelyanos ma de orijen (köken) turka de preferensya (tercihen).
Ay 2000 doktores en el kuadro de la universita Bar-İlan, ke estan dando muncha emportansa a la
“Nano-Teknolojiya” i adelantaron muncho sovre las bushkidades fizyolojikas i psikolojikas del meoyo.
Despues de esta vijita enteresante, mos fuimos a Sfat.
Sivda enteresante kon sinagogas i galerias de pinturas, tablos desinados de multikolores turistikos.
Vijitimos una sinagoga ashkenaz diferente de las otras. Lo ke me vino enteresante fue ke no aviya mezuza en la puerta. La sigunda sinagoga estava serrada porke aviya una bar-mitsva, no mos desharon entrar.
Enfin, a la torna los amigos mos envitaron a sus kazas i este dia se termino kon grande felisitad.
A kontinuar...
