Desde unos kuantos anyos, la kestyon ke vyene de una manera kaji obsesiva al esprito de muncha djente i mezmo de varyos shefes de governo, es: “Eske la humanidad esta pronta a afrontar la mundyalizasyon?”.
Despues los muy tristes faktos kriminales de Boston, un ayre de sospecho sopla sovre la Amerika del Norte, potensya konsiderada (ainda oy) komo ser la mas poderoza de todas, i ke kultiva una muy ancha konsepsyon de lo ke sinyifika la palavra “demokrasia”, lakuala va asta tolerar las tradisyones kultuales i kulturales de kada etnia ke vyene instalarse sovre sus tyerras, a la sola kondisyon de no ser un danyo para kualkyer otro grupo de personas.
Esto dicho, reviniremos a la mizma pregunta: “Eske la humanidad esta pronta a afrontar la mundyalizasyon?”. La repuesta es simple, la mundyalizasyon ekonomika, por seguro “Si”, las grandes inegualidades monetaryas entre payizes i mizmo individuos son faktores negativos ke obstruen un desvelopamyento real al nivel internasyonal.
Bazandose sovre el ultimo raporto del patron de la Banka Mundyal, Jim Yong Kim, la Prensa oksidental mos dize aproksimativamente lo sigyente:
“...el grande milagro de la ekonomia mundyal kontinua syempre; (sin byen entendido la Fransya i la Evropa ke aktualmente se topan eyas mizmas en estado de kriza i resesyon) Nunka el mekanizmo ekonomiko mundyal lavoro mijor ke en este momento, Nunka su misyon la mas importante ke es de asegurar el ‘byenestar’ sovre tyerra, no reusho mijor ke en estos dias”
Syempre segun lo ke meldi en la mizma revista: “En el anyo 2000, 193 Estados i 23 Organizasyones internasyonales reunidas en New York avian adoptado 8 grandes objetivos entre los kualos ‘el de divizar por dos la provedad ekstrema en el mundo, asta el anyo 2015’ objetivo ke fue realizado dos anyos antes la data fiksada... En 1990, 43% de la la populasyon del mundo bivia kon manko de 1,25 dolar por dia i persona, en 2010 solo 21% kedo en este estado... En desparte de esto, el shifro de ninyos no-eskolarizados diminuo de mas de 40%”.
‘El triumfo de los esforsos para el desvelopamyento de payizes ke se topavan 20 anyos antes en grande difikultad ekonomika, sometidos a la ambrera i a la inyoransa’ es inkontestavlemente una viktorya immensa del humanizmo kontra la inegualidad i la inyoransa.
En este kavzo, komo eksplikar las olas de odyo i rankor ke se manifestan kontra los instigadores mizmos de esta maraviyoza evolusyon? komo definir este instinkto de destruksyon ke se desperto desde un largo tyempo en algunas populasyones de la Afrika i de la Asia?
Sera muy difisil para los Estados Unidos ‘payis de azilyo i hospitalidad’ i en mizmo tyempo ‘payis de progreso i adelantamyento’,de venser el sentimyento de dubyo ke inevitavlemente se instalo en el .
El relato, en varyas gazetas, de la sufriensa fizika i tambyen psishika de multiples feridos ke pedrieron en esta sirkunstansya un membro del puerpo, la konviksyon ke la desgrasya vino, no de un puevlo enemigo, ma de adriento del payis, de parte de personas ke resivyeron azilyo i hospitalidad, krea una atmosfera de deskonfiansa ke sera difisil a venser.
Ke sera el Mundo Oksidental de ‘a manyana’?
