El famozo eskrivano Fransez, Corneille (1606-1684) dize: “A la persona ke save emplear el diya kon echos provechozos, la verdadera felisidad viene oras de tadre…”. Estas palavras pueden no tener un raporto direkto kon la tema ke vamos analizar oy, ma me plazen achakes del mesaje ke kontienen i por esta razon las kije sitar aki. Ya es verdad ke a primera vista, no vemos un raporto entre las nosyones “felisidad” i “optimismo”. Ma, yo syempre tuve la konviksyon ke , una persona optimista tiene munchas razones i okazyones de ser feliche.
Komo puedemos definir el optimismo? Unos dizen ke es la fakultad o el dono de una persona sigura ke lo bueno, lo pozitivo va triumfar. Asigun otros, es una tendensya a ver syempre el lado ermozo, afirmativo de la djente, de los eventos i de las kozas. Es pensar, ke de una manera se va reushir, es tener konfiensa en si propio. Par konsekuensa, el optimisto es akel ke kree ke todo va ser por lo mijor i es konfiente en la reushita. El optimisto mira a la vida de una ventana pozitiva. Aki me va permeter un chiko espri: “Es komo djugar a “POLLYANNA” todo el tyempo!…
Solo atansyon! Aki no kero ke ayga kualkyer malentendido. Ya es verdad ke dishe ver las kozas de una ventana pozitiva o djugar a Pollyanna. Absolutamente esto no kere dezir mirar a la vida kontinualmente kon entojos de lunas roz. En Turko ay una ekspresyon “Hayatı toz pembe görmek”. Esto sinyifika jeneralmente, un komporto komo ke todo esta verjeles, no ver, no saver, no enteraserse a las mizeryas i problemas de los otros. Esto, asigun mi es un komporto egoisto i afilu una manera de irresponsabilidad.
Bueno, lo ke kero dezir yo es kompletamente diferente, ma, no esto muy sigura de ser kapavle de bien eksprimirme. Yo kreo ke la persona optimista no es egoista. Eya ve, se rende kuento de la mizerya, del apreto, de los problemas del de enfrente ansi ke de los suyos o komo ke fueran suyos. No dize “Me lo futro!, no se dezenteresa…En la mezura de su posivilidad, perkura a dar apoyo seya moral o seya otro, komo ke se tratara de sus propios problemas. Bushka remedyos i kree de una manera o otra ke se va reushir a topar una solusyon.
Kree tambyen, sinseramente, ke egziste mas desfortunados, mas malorozos ke eya propia. Komo dizimos en turko,“beterin beteri var!”. Asigun mi, esta manera de ver las kozas, aze kreser chikos semyentes de felisidad en los korasones. Espero ke reushi a eksprimir mis ideas. El optimismo es una partikolaridad rezya i mizmo, puedo dezir ke es una kapachita i afilu, una kualidad. Kero meter el punto final kon estas palavras ke me plazen muncho i estan bastante en akordo kon lo ke eskrivi. “Si tienes syertas razones de azer loores, es ke ya alkansates a una manera de felisidad.”
En jeneral, syempre krei, ke de alguna manera se topa solusyon, remedyo a los problemas. İ, esta kreensa optimista fue toda mi vida i es oy en diya, una fuersa moral para mi. Todos deven provar i reushir.
