El total asta oy de las viktimas del desfondamyento del edifisyo en Bangladesh, ande se topavan multiples ateliers de kustura por el kuento de grandes markas de vestimyentas evropeas i amerikanas puja de dia en dia i ya sovrepaso el shifro de 600 muertos i multiples ferridos.
El Papa Benoit ke por seguro mete la Etika i la Djustisya al sentro mizmo de la relijyon, disho a este sujeto: “El lavoro de los ovreros de este payis es un lavoro de esklavo, trenta i ocho Euros (50 dolares) al mez para bivir, tal era la mezada de los ke muryeron... No pagar el salaryo djusto, bushkar solo el profito personal es ir kontra Dyo... el mundo de oy konose malorozamente este djenero de esklavaje…
Si, mas de 600 personas pedrieron la vida por kavza no solo de neglijensya ma de profito… “pagar el minimum a los lavoradores ovligados de penar i lazrar en kondisyones malsanas i muy peligrozas, adriento de una fragua ande las paredes eran yenas de chatladeaduras (fisuras) ke anunsyavan su desfundamyento imminente” es un krimen no solo de parte de los patrones de los atelyes i injenyores lokales, ma tambyen de los klientes ajenos ke akseptaron esta terrivle situasyon para syenes i syenes de personas, en el solo eskopo de obtener el presyo el mas basho afin de realizar la ganansya la mas alta.
Una kestyon inevitavlemente mos vyene al tino ‘Es ke realmente el esklavaje fue erradikado enteramente? Al pareser el troko unikamente de fizyonomia ma no de esensya... Syempre las mizmas indjustisyas, no solo en el espasyo monetaryo, ma tambyen (lo ke es imperativo) en la avaluasyon del derecho a la vida de kada ser humano sin distinksyon entre las varyas klasas sosyales.
Parafrazando el grande biolojisto fransez del siglo pasado ‘Jean Rostand’ ke avia dicho aproksimativamente lo sigyente konsernando la formidavle evolusyon syentifika de los tyempos prezente: “la Syensya ayego a un grado de desvelopamyento tan grande, ke la ovliga imperativamente a ser vertuoza”, puedemos tambyen dezir lo mezmo por el enfloresimyento komersyal de mas a mas provechozo para los unos i paradoksalmente de mas a mas periklolozo para los otros.
No mos olvidaremos ke el komersyo fue uno de los prinsipales promotores de la sivilizasyon, a kondisyon de observar estriktamente sus reglas imperativas de moralidad… El interkambyo de merkansias ansi ke de kompetensyas diferentes desvelopo el kontakto entre las personas. Oy, pushados por una kompetisyon insesante, los varyos protagonistos se topan tambyen en el ovligo de kontinualmente perfeksyonar sus produktos i mijorar sus kondisyones de vendida, lo ke es perfektamente komprensivle, ma syempre komo dicho mas arriva, kon el ovligo absoluto de nunka ser un faktor de danyo para kualkyer otra persona
El komersyo por ansi dezir deve ser un troke perpetual de rikezas diferentes ande kada uno es ovligado de ser kudyozo no solo de protejar su propyyo interes, ma tambyen el interes del otro. En la desgrasya del desfundamyento del grande sentro de lavoro en Bangladesh, esta ley de oro no fue malorozamente observada.
Ke devino el vyejo presepto del djudaizmo de los siglos primeros ke ovligava el patron a dar a komer a su ovrero lo ke el mezmo komia i a bever lo ke el mezmo bevia?
