Kada anyo, a la okazyon del “Diya de la Madre”,en esta pajina, o en “El Amaneser”, no manki de eskrivir sovre muestras madres, sovre todas las madres. Naturalmente kada madre es unika para sus ijos. No se puede enyegar ke ser madre es sinonimo de “Devuamiento”. Ay syertas madres ke izyeron la “Abnegasyon” sus manera de bivir, asta sakrifikarsen , komo el akto sublimo de una madre antes 2 anyos en Bingöl, sivdad al Este de Turkiya. Una madre manseva ke, vyendo un teroristo pronto para lansar una bomba, se echo delantre sus dos kriaturas, ekspozandose ansi, a una muerte terrivle…
Ser Madre…Otruna vizyon ke me kedo plantada en mi memorya, afilu ke paso 7-8 anyos. Myentres el Ayuno de Ramadan, una manseva, en el zifo de la madrugada, vestida de un “jeans”, anorak i kasketa, probablemente para darse una aparensya maskulina i lo mas enteresante, un davul enkolgado al ombro. Malgrado el friyo, malgrado los perikolos de la eskuridad, esta batyendo el davul para espertar los muzulmanos ke deven ampesar un muevo diya de ayuno. Ansi esta madre espera ganar unas, kuantas liras de bahshish para pueder yevar pan a sus kriaturas… Agora, kero relatar de la boka de un ijo, un teksto ke me fue embiyado. Lo tresladi i guadri en mis arshivas.
“La idea de mi mujer de salir yo kon mi madre, me sorprendio kuando me disho una noche: “Ya se ke la keres muncho. Le deves apartar tyempo i a eya.” En el bulush de la vida, de mis tres ijos, es verdad ke aviya bastante neglijado mi madre. La bushki para envitarla a komer afuera i al sinema. Kedo enkantada i me demando si alguna koza no estava kaminando bueno! Mi madre era de estas personas ke supsonan un malor de un telefon, de una envitasyon non abituala!!.. La kalmi en dizyendole mi dezeo de pasar unas kuantas oras kon eya. Intrigada me demando: “Solamente tu i yo?!! antes de achetar.”
“Fui a tomarla, ya estava asperando pronta, bien vestida, bien kuafada. Remarki su nyervozidad igual ke la miya. Me arresivyo kon una sonriza, luminoza komo un andjelo: “Les dishe a mis amigas ke va salir kon mi ijo. Deven estar despasensyozas de sintir lo ke les va kontar!!”. Entrimos al restorante, eya kon una grasya de reyna. Le meldi el “menu”, eya no pudiendo atinar las letras chikas. Sospirando kon una ekspresyon nostaljika me disho: “Kuando eras chiko era yo ke te meldava el menu...”
“Tuvimos un ermozo moabet myentres la komida avlando del pasado i de la vida. Komo ke keriyamos ratrapar los anyos pyedridos... Avlimos tanto ke no mos apersivimos afilu de la ora del sinema ke ya aviya pasado. En deshandola a su kaza me disho ke keriya salir otruna vez kon mi, a kondisyon de ser yo su invitado. Dechidimos de toparmos en serka.
“Mi mujer me estava asperando, kuryoza. Le konti komo paso muestra nochada... Una nochada muncho mas ermoza de lo ke podriya esperar. Pasaron unos, kuantos diyas... Mi madre tuvo una seryoza kriza kardiaka i la pyedrimos. Aviya akontesido tan supito, ke no tuve dinguna shans de azer alguna koza para eya.
“Paso un syerto tyempo. El restorante ande aviyamos komido, me mando una faktura “pagada” djuntos una kurta letra eskrita de la mano de mi defunta madre: “Kerido ijo, pagi de avans esta faktura porke estava yo syen por syen sigura ke no iva pueder alkansar al rendez-vous ke dechidimos los dos. Portanto, aranji un “dine” de dos personas. Kero esta vez ke estes kon tu mujer. No te vas a pueder nunka imajinar lo ke sinyifiko las oras ke pasimos tu i yo... Te kero muncho...”
Keridos lektores, estas linyas konfirman la importansa de dizir “te kero bien”, de apartar tyempo a las personas de muestra vida, a los paryentes, a los amigos ke lo meresen. Porke en vida, nada es mas importante ke famiya i amistad. Daremos a eyos el kudyo i el tyempo ke es sus derecho. No pensaremos ke tenemos el lukso de atrazar esto para un “otro momento”, un momento ke puede ayegar muy tadre...
