Lunes el 6 del mez koryente, empeso en Almanya el proseso kontra Beate Zschäpe lakuala partisipo aktivamente a una serie de asasinatos de esensya neo-nazi kontra varyos emigrantes estranjeros, entre los kualos 8 lavoradores de orijen Turka ke pedrieron salvajemente la vida, viktimas del odyozo radikalizmo ultra nasyonalisto ke ainda oy en dia, 70 anyos despues la Shoa, egziste en el esprito de varyos desendyentes del rejimen hitleryano.
La persistensya de ‘este odyo kontra el estranjero‘ i de ‘este refuzo del otro’ ke karakterizan aktualmente la manera de pensar de algunos almanes (por la mas parte venidos del Este) konstitue, mizmo si es raramente, un perikolo de ekspansyon en muestra epoka ande la manseves (entregada jeneralmente a la fuersa brutal de una kompetisyon insesante) manka del apoyo moral ke prokura un verdadero ideal espiritual a alkansar.
Una vez mas, se syente la absensya (al nivel individual komo tambyen kolektivo) de las varyas valores etikas simplemente humanas ke solas puedran salvar el ombre de esta sensasyon de toparse en un espasyo vazio de kualkyer apoyo moral al kual engancharse.
