Yom Yerushalaim es una fiesta nasional ke se selebra kada anyo en el ocho de Mayo. Este diya komemora la reunifikasion de Yerushalaim, i el establisimiento del kontrol de İsrael sovre la sivdad vieja en el anyo 1967. El Grande Rabinato de İsrael deklaro este diya tambien komo una fiesta relijioza por remersiar al Dio por la viktoria de la Gerra de Sesh Diyas, i de responder a la orasion de Pessah: ‘El anyo en viniendo en las tierras de Yerushalaim’.
Yom Yerushalaim se fiesta kon seremonias del estado, servisios komemorativos para los soldados ke murieron en la gerra, konferensias sovre Yerushalaim, paseo en el sentro de Yerushalaim, i resitasiones de la orasion Hallel kon benediksiones en las Sinagogas. Ay tambien programas en la televizion kon kantes i bayles.
En las eskolas del pais entero, va aver lekturas sovre la emportansa de Yerushalaim. Las eskolas de Yerushalaim selebran la fiesta kon reuniones festivas.
En los Estados Undos i en otros paises,Yom Yerushalaim se fiesta kon aktividades i selebrasiones komo en İsrael.
En el anyo 2007, se selebro el kuarenten anyo de la reunifikasion de Yerushalaim. El slogan de las selebrasiones del anyo 2007 fue ‘Una Koza Espesial para Todos’. Un logo espesial reprezantando el numero 40 se aparejo, i se enkolgo a la entreda de Yerushalaim, i fue dekorado kon luzes.
Este anyo se esta fiestando el kuarenta i seshen anyo de la reunifikasion de Yerushalaim. Las selebrasiones de este anyo vana empeser noche de Martes. Programas relijiozos se aparejo para aksantuar la signifikasion espiritual de Yerushalaim en el Tanah. La Marcha de Kotel se aze kada anyo. A media noche, de diferentes puntos de kada sivdad, sienes de personas empesan a irsen a pie a la vieja sivdad de Yerushalaim. Esta marcha empesa a media noche para pueder arivar al Kotel a las sinko de demanyana, i pueder azer la orasion de demenyana en el Kotel. El Bayle de las Bandieras es tambien una otra selebrasion ke se repeta kada anyo. Este bayle empesa en el sentro de Yerushalaim, i el puevlo entran de todas las puertas a la sivdad vieja. El bayle se eskapa kon una seremania en el Kotel. Un show espektakular se apareja en el muzeo Tower of David Museum, ke es un muzeo istoriko ariento de las paredes de la sivdad vieja por la Puerta de Jaffa. Akeya noche se apareja un show espektakular de luzes, i la istoria de la sivdad se reanima kon imajes i bozes.
Por este diya dos shefes, el top shef David Mendes, i el Sushi Shef Yamamoto konosido komo ‘Sushi Queen’, endjuntos vana amostrar sus talentos para krear una sansasion de savor. Vana aparejar komidas del Oriente i del Oksidente. Todas las komidas vana ser kosher, kon el vino kosher, las diferentes komidas, el arroz de sushi, las saladas, las tartas de chokolata i las frutas.
