Ay kaji dos anyos ke me esto okupando de los aedados ke no tyenen kriyaturas, ke no tyenen famiya i kuando peryen el kompanyero de sus vidas estan kedando solos. Pensando sovre las problemas ke tyenen, me vino al tino de eskrivir sus vidas asoladas.
Kualo es la soledad? Kualo se puede azer para no kedar solo? Ay personas ke mizmo ke tyenen famiya, estan solos. La vida i el dor de oy troko enteramente. Una vida loka, todos los mansevos koryendo para el lavoro, no ay ni oras fiksas, ni dias de repozo, kon los telefones en la mano ni pueder avlar, ni mirar a los ojos del den frente, ni tener tyempo para iyir a vijitar a las granmamas i los granpapas.
Topar tyempo para todo, ma para los aedados syempre estan okupados.
Siguramente todo troko, antes moravamos todos en el mizmo sentro, todo era serka, no aviya trafik. Teniyamos pasensya de oyir al den frente, teniyamos kerensya. Malorosamente oy una grande partida esta pensando a si mizmo, i no dando emportansa a nada.
Enfin, todos ke tengan byen i mozos tambyen.
Viniremos a lo muestro. Ay una palavra ke dize:
“Envejeserse es un privilejyo”.
(Yaşlanmak bir ayrıcalıktır).
En todo modo de punto de muestra vida, kade saver la valor de las okupasyones diferentes. Si se kere, ay munchas kozas de azer para no kedar solos.
Por egzempyo;
- Lavorar en organizasyones de aedados, de kriyaturas, de hazinos i okupar en tomando responsabilitades para ayudarles i para ke esten mas orozos.
- İyir a kursos, para ambezar, tener amigos diferentes i lo mas emportante para azer lavorar el meoyo.
- Meldar livros, eskrivir.
- Asistar a los paseos kulturales (kültürel gezi), para konoser lugares muevos, ambezar i estar en kompanyiya.
En primero kale estar sanos i rezyos para pueder azer esto todo.
Para una persona la soledad, kedar solo es un sintimyento de alesharse de la vida. Esta persona se syente arankada (kopmuş) de la sosyetad.
La persona ke se syente sola es yena de estos sintimyentos ke la pueden yevar a una depresyon fuerte. Eyos se syenten abandonados, apartados (dışlanmış), sin konfiensa (güvensiz), dezesperados, insinyifikantes, sin valor, sin emportansa (değersiz), i yena de ravya (kızgınlık) al den frente.
En el fondo de sus penseryos ay; ke dingunos no los keren byen i sovre esto eyos tyenen munchas difikultades en la vida sosyal para tener relasyones kon el den frente.
En razon de estos todos faktos; si toman un telefono de una persona non konosida mizmo, se gustan i se kreyen ke ay dgente ke esta pensando a eyos i se esta okupando ande tyenen difikultades.
Por egzempiyo; una mujer u un ombre aedado ke no tyene dingunos de su famiya para okupar, kere iyirse a un ospital para azer analizes u no esta puedyendo merkar los menesteres para su kaza, u se esta organizando para todo, ma kere avlar dos palavras, kere estar akompanyada, ayudarles en esto es una grande satisfaksyon para el den frente.
Vijitarlos en el ospital u en sus kazas, yevarlos ande keren, dar unas dos oras para ke esten orozos, azer esto todo de alma i korason es tener la konsensya repozada (vicdan huzuru).
Kero terminar kon unas palavras ermozas de unos kuantos eskrivanos famozos en este sujeto.
NEWTON: “La amor es fondar pontes (köprü kurmak). Aser ke las personas tresan paredes (duvar örmek), en lugar de fondar pontes, i por esto kedan solas.”
GEORGE SAND: “La persona ke no da kerensya es sola en todo modo de lugar i en todo modo de koza”.
BACON: “No tener un aliado verdadero (gerçek dost) es lo mas negro por la soledad”.
CEHOV: “Todos los lugares paresen a un dizyerto (çöl), por la persona ke se syente sola”.
GOETHE: “Soledad es un byervo ke se dize kon muncha fasilidad, aser ke bivir la soledad es muy difisil.
Enveranada buena i kedavos en la buena ora Keridos Lektores.
