Ay mas de un mez ke la prensa internasyonal mos anunsya la muerte iminente de Nelson Mandela i ke mos dize ke el mundo entero (ombres i mujeres de ideolojias diferentes) lo yoran, no solo komo un eroe, ma komo un djusto, en la sinyifikasyon la mas ancha de la palavra.
El fue un ombre ke despues de aver luchado al peligro de su vida i de su propya libertad para afrankar sus ermanos del yugo horrivle del ‘aparteid’, peno de toda su fuersa (despues la abolisyon de esta ley salvaje)para salvaguadrar esta vez ‘el enemigo de ayer’ de la rankor de los ke durante largos anyos fueron oprimidos i trespizados en sus dinyidad de humanos.
Una gazeta elektronika franseza mos ambeza ke:
“Un shefe tradisyonal del trivyo delkual Nelson Mandela es orijinaryo, dize ke la agonia del grande Ombre de Estado afrikano se esta alargando porke su alma no esta en paz; segun el, los ansestros del moribondo son perturbados por kavza de pletos ke malorozamente oskuresen la harmonia de su famiya, i es solo kuando Nelson Mandela sera liberado de la anksyedad ke le prokura esta situasyon i kuando todos sus serkanos seran enterrados a “Qunu” ke el topara la Paz Eternal.”
(A kada uno sus kreensas i su manera de pensar)
Ma revineremos sovre tyerra i veremos kualo fue la vida de Nelson Mandela. Segun el rezultado de una chika bushkida ke ize en el sityo wikipedya, me ambezi ke : nombrado ‘Mabida’ en su trivyo, el nasyo en el anyo 1918 en la Afrika del Sud, payis puevlado kondjuntamente de Pretos i Blankos i fue uno de los mas grandes dirijentes historikos de la lucha kontra el sistema politiko de ‘apartheid’ antes de devinir prezidente de la Republika del Sud de 1994 -1999.
En su manseves, a la edad de 26 anyos, el entro en el kongreso Nasyonal afrikano (ANC) en el anyo 1944 afin de luchar kontra la dominasyon politika i la segregasyon rasyal inflijida por la Minoria Blanka a la Mayoria preta. Avokato muy apresyado, fervente admirator de Gandhi, el partisipo kon ardor a la lucha sin violensa kontra las leyes indjustas ke trespizavan sus ermanos pretos.
Malorozamente en 1960 el kongresso afrikano ANC fue prohibido por los blankos, i ansi Nelson Mandela realizando ke la lucha pasifika no dara mas ningun rezultado tanjivle, fundo i dirijo un ramo militaryo ke empeso un lavoro de sabotaje kontra varyas instalasyones publikas, aktos por los kualos el fue arrestado el 12 djulyo 1963 i kondenado a ser enkarselado a perpetuidad.
27 anyos mas tadre, afrankado el 11 februaryo 1990 a la sigida de varyos trokamyentos en la governansa del payis i de la abolisyon legal del “apartheid”, Nelson Mandela sin rankor por todo lo ke el personalmente avia sufriido ni demandar kuento por los aktos kriminales de los opresores, se adjunto al Shefe afrikaner blanko “Frederik de Klerk” para krear una situasyon pasifika i fraguar un Payis Multinasyonal ande kada uno iva gozar de los mizmos derechos delantre la Ley i la Djustisya, lo ke valyo a los dos protagonistos la obtensyon del premyo Nobel de la Paz.
Es ke la Afrika del Sud devino realmente una tyerra de perfekta harmonia i igualidad? Por seguro no. Un semejante objetivo no puede ser realizado de un dia al otro… El puevlo komo tambyen los dirijentes tyenen ainda muncho a luchar entre eyos mizmos i kada uno kon si mizmo,
Los Blankos deven respektar los ke tyenen una otra kolor de kuero kel suyo i sovre todo son ovligados de renunsyar a sus dezeo de hejemonia i akseptar kon buena voluntad el afrankamyento de sus ermanos de kolor diferente. A sus torno, los pretos deven ambezarsen a utilizar esta libertad en favor de un adelantamyento progresivo.
Oy en dia komo mo lo dize un komentador espesyalisto de esta parte del mundo, un kuarto de los sud-afrikanos no komen asta artarsen enteramente, la mitad de la populasyon se topa ainda debasho el umbral de la provedad, enormes inegualidades entre blankos i pretos perduran syempre i son solos los blankos i un punyado de pretos ke se enrikesyeron de una manera eksesiva sin por esto ser prontos a partajar sus opulensya kon sus ermanos en la mizerya.
Por seguro ke imajinar ‘un trokamyento immedyato i absoluto de la situasyon en un payis ke konosyo el apartheid’ era i es ainda una utopia...ma kon perseveransya i partikularmente solidaridad mutual, la utopia poko a poko puedra devenir una verdad...
