Tisha Beav

En este teksto, vamos a nombrar otruna vez el “Dekreto d’Ekspulsion”, konosido tambien komo el “Edikto de Elhamra”. En esta semana de Tisha BeAv, muy probavle, en un kurto  rezume puedemos tambien akodrar las konskuensas (o syertas) de la Ekspulsion de Espanya.

El sovredicho Dekreto fue sinyado en el Palasyo Elhamra de la sivdad de Granada, el 31 Marso 1492, por la Reyna  Kastilyana Isabel i el Rey Ferdinand de Aragon. Asigun este dekreto se estava akordando a los djudios un tyempo de 4 mezes. Entervalo de esta perioda deviyan tomar una desizyon: o ivan achetar de konvertirsen al Katolisizmo o ivan abandonar la Espanya. Komo un azardo trajiko de la fatalidad, el 31 Julio del anyo 1492 estava koensidando kon el diya de Tisha BeAv.

Granada… La grande forteresa de los Muzulmanos de Andaluziya (Endülüs), kayo en el presipyo del anyo 1492. I, solamente despues de poko tyempo (3 mezes) fue deklarado el sovredicho Dekreto ke estava akordando a los djudios la posivilidad , la alternativa de trokar sus relijyon. Ma, los djudios estavan konsientes ke esto no iva ser una manera sigura de salvasyon de la muerte, de la Inkizisyon. Porke, sin afilu ser djuzgados, los ke eran akuzados de Kripto-Djudaizmo, eran mandados a la muerte. Portanto, malgrado este dubyo, kaji medyo milyon de djudios preferaron trokar de relijyon i kedar en Espanya.

Ay diversas ipotezas sovre el shifro de djudios ke abandonaron la Espanya. En mayoriya, se supozo ke es komo 500.000. Asigun una evaluasyon del ONU (Nasyon Unidas), konsiderando akeya epoka, este shifro reelmente es muy importante i aze pensar ke fue una emigrasyon masiva.

Una grande partida de los ekspulsados eskojyeron el kamino mas kurto, mas fasil i se refujyaron al Portugal. En el empesijo, fueron otorizados de instalarsen en este pais, en pagando una suma. No keryendo konvertirsen al Katolisizmo, estos djudios aviyan preferado una vida de egzilados en la Diaspora, al lugar de transformarsen en “verdaderos” o “falsos” konversos en Espanya. İ estos egzilados tambien, konosyeron en Portugal, la mizma suerte de los ke se aviyan kedado en Espanya.

Porke, el Rey Manuel bushkando kaminos para  aserkarse de los monarkos de Espanya prefero azer mutual  matrimonios. I kon el mizmo eskopo en 1496 publiko el Dekreto forsando los djudios a la konversyon  o a la ekspulsyon. Ma, en realidad, el Rey no estava muy dezeozo de peryer los espesyalistos i savyos djudios. Kon una grande presyon, los forso a trokar de relijyon i kedar en Portugal. Esto fue el empesijo de la Estoria trajika de los Marranos del Portugal, del egzodio, sigiendo el grande masakro del anyo 1506.

En el anyo 2006, syendo el 500. aniversaryo del grande masakro de los djudios de Lisbona, se organizo seremoniyas en Portugal en komemorasyon de los djudios ke fueron asasinados en las kalejas de Lisbona en el 19 de Avril 1506… 

Komo lo afirmimos mas ariva, el Egzodyo del 1492 fue grande i masivo. El de Portugal no fue identiko. Empesando del 16. Siglo, kontinuo asta la mitad del 19. Siglo. En mayoriya, los djudios emigraron a Fransia, Olanda, Beljika, Italia (Livorno, Venezia, şoransa) ets.. Dunke, una grande partida de los djudios ekspulsados de la Espanya en 1492, se dispersaron en los paises Mediterraneos i en el Imperio Otomano.

 Los djudios de la peninsula Iberika, en la “Era de Oro”, myentres la soverenedad Muzulmana, tuvyeron una grande libertad. Fue ansi ke adelantaron en las Sensyas i el Arte. Yevaron sus konosensyas kon eyos a todos los paises ande emigraron i se instalaron.