Dominique Strauss Khan reabilitado i realsado

A la eksepsyon de unos kuantos diaryos o semanaryos (entre los kualos la pajina Djud eo-espanyol del Şalom, a varyas datas) la Prensa internasyonal  i kon eya  la franseza, fueron doz anyos antes de una severidad  kaji feros kontra el grande ekonomisto Dominique Strauss-Khan, komo pushadas por un dezeo de arrastar en el lodo un ombre ke avia kaji ayegado al punto kulminante de su karyera.

Komo por seguro vos akodrarash muy byen,  en el mez de  Mayo 2011, ‘sin prova tanjible ni ningun testigo okularyo’, sovre baza simplemente de la  deklarasyon de  una lavorante del otel Sofitel de New-York ke  pretendyo  aver sido agresada  seksualmente de parte del ex prezidente del FMI , la Djustisya Amerikana  sin azer prealablemente una enkuesta judisyal, lo trato immedyatamente komo un vulgar kriminal , i unas kuantas oras mas tadre la prensa internasyonal lo mostro :  manos atadas detras la espalda, detenido de kada parte por dos jendarmas.

Fue un imajen horrivle de la degradasyon publika de un ombre ke gozava de la estima kaji mundyal por los servisyos ke el rendia en el espasyo de la ekonomia internasyonal i ke en supito fue konsiderado  komo un ordinaryo agresor .

 Es verdad ke poko despues, a la sigida de una real enkuesta i de un verdadero interrogatoryo, Dominique Straus Khan  fue  afrankado del ovligo de kedar  enkarselado i ke un procheso normal empeso, el kual fue kloturado en su favor por kavza de absensya absoluta de provas o indisyos  probantes i tambyen por falta de konfiansa en las keshas de la impyegada del Sofitel.

  A su retorno en Fransya, payis portanto  reputado por su libertad de pensamyento, empeso entonses para el, el suplisyo de una serie de muevas akuzasyones  sin kualkyer konsistensya legal ma yenas de un odyo intenso difisil a entender.

Komo se asperava, despues de mezes i mezes de enkuestas i analizis profundas, los tribunales fransezes tambyen lo afrankaron esta vez totalmente de kualkyer akuzasyon de kulpabilidad, i  poko despues el Senato Franses ( konsiderado de todo tyempo  komo la Kamara de los ‘byen pensantes’) lo konvoko personalmente para diskutir al sujeto de la ekonomia del payis, lo ke fue una real reabilitasyon.

Su primera entrevista (interview) publika de persona enteramente libre, el prefero azerla kon el  organo amerlkano  CNN i (al pareser) no kon una gazeta franseza.

A la pregunta del djornalisto, konsernando  la dezastroza situasyon ekonomika de la evropa, DSK  disho lo sigyente:”‘Angela Merkel komo tambyen François Hollande i tambyen los dirijentes de los otros payizes  Evropeos no estan entendyendo ke ‘ninguno puede rezolver  solo los problemas aktuales’ , esforsos kolektivos son absolutamente nesesaryos i para esto kale un ekipo kompuesto de myembros de varyos Estados.”

İ kuando le fue demandado si  personalmente  el tyene  proyektos politikos para el futuro, Strauss Khan respondyo negativamente. “Aktualmente nombrozos payizes en situasyon de desvelopamyento demandan mi opinyon i mis konsejos , me syento kontente de ayudarlos. Asta un pasado muy serkano, pasi toda mi vida a ayudar el puevlo Fransez a mijor bivir, deke no esforsarme de azer lo mezmo al nivel mundyal.? “