Aki Estamos kon la kolaborasyon de l’Alliance Israelite Universelle organizaron la sigunda Universidad del Judeo-Espanyol en Paris en el suntuozo edifisio Edmond Safra. Fueron unos 6 dias yenas de aktividades ke los judios de Fransia pudieron gozar. Kada demanyana de las 10 a las 12 uvo kursos de Judeo-Espanyol dados en dos niveles. El primer nivel fue dado por Marie-Christine Varol i el sigundo por Karen Gerson Şarhon i Fani Ender. Aviya mas de 10 elevos en kada klasa ke disfrutaron de la saviduriya de sus profesores. Aviya elevos ke eran profesores de Espanyol i ke kerian saber mas muncho sovre el Judeo-Espanyol, aviya elevos ke konosian la lingua un poko a traves sus gramamas i granpapas i ke kerian oyir los mizmos sonidos de muevo. Para eyos fue un tiempo pasado en nostaljiya. Meldaron anekdotas, artikolos de El Amaneser; kantaron kantes sefaradis; diskutieron sovre varias temas ets. Los elevos i los profesores pasaron muy bien.
En kada demanyana tambien aviya klases de muzika sefardi dirijidas por la grande profesora Susanna Weich-Shahak. Eya i Kobi Zarco enkantaron a la djente kon sus karizma i saviduriya.
Empesando a las dos despues de medio dia, aviya atelyes, konferensias, mesas redondas ets. ets. Un program bastante yeno. El ekipo turko kompozado por Metin Delevi, Karen Gerson Şarhon i Fani Ender tenian una sesion el mierkoles, 10 de Julio. Metin Delevi avlo sovre la komunidad judia de Turkiya en diziendo ke la komunidad se esta amenguando den dia en dia. Mostro istatistikas ke ay mas muncho ke se estan muriendo ke estan nasiendo. Fani Ender avlo sovre sus rekuerdos de Estambol en su chikez. Mostro fotografiyas de un Estambol kaji olvidado i avlo de lo ke fueron sus eksperiensas en este Estambol de su chikez. Karen Gerson Sarhon avlo sovre el Sentro Sefaradi i de las aktividades i proyektos ke se estan aziendo para prezervar i dokumentar la erensia kultural ke tenemos. Aki devemos de presizar ke entre todas las konferensias ke se dieron en estos dias en Paris, la sola konferensia dada en Judeo-Espanyol fue la de Karen Şarhon. Karen insistio a dar su konferensia en Judeo-Espanyol por ke sintio ke era su dover de avlar en esta lingua ke se esta desaparesiendo. Para lo ke no entendian la lingua aparejo un powerpoint en franses, la traduksyon de lo ke estava avlando i asi todos entendieron lo ke disho.
Kale aki felisitar espesialmente a Jenny Laneurie i François Azar ke se kansaron enormemente en organizando este evenimiento muy kargado. Bravo a todos los dos. Para kada anyo mijorado!
