a) İsrael deklaro estar pronto a liberar algunos prizyoneros Palestinyanos:
Afin de manifestar su buena voluntad konsernando un retorno a la meza de negosyasyones kon los delegados de Mahmud Abbas para diskutir al sujeto de la kreasyon de un Estado Palestinyano, Benyamin Netanyahu deklaro ke Israel se esta aparejando a liberar algunos prizyoneros palestinyanos ke se topan enkarselados en el payis.
La prensa Oksidental mos dize ke esta desizyon intervyene a la sigida de largas diskusyones de ‘John Kerry’ (Sekretaryo de Estado Amerikano) kon los governadores de las dos partes.
Las negosyasyones en kestyon seran dirijidas de una vanda por delegados palestinyanos i de la otra por un grupo de Israelyanos debasho la direksyon de la aktual ministra de la Djustisya ‘Tzipi Livni’, fervyente partizana de la solusyon de ‘dos Estados, el uno İsraelyano el otro Palestinyano’ enteramente independyentes el uno del otro, ke biviran lado kon lado, lo ke muy probablemente puedra permeter relasyones de buen vezindado i puede ser de ayudo mutual.
Komo por seguro vos akodrarash , ‘’la kestyon de dos estados, todos los dos igualmente otonomos i libres’’ fue el tema prinsipal de la kampanya elektoral de Tzipi Livni, durante la formasyon del aktual governo Israelyano.
Tal ke ya vo lo aviamos dicho en el pasado, Tzipi Livni fue de syempre kontrarya a la egzistensya de un “Grande İsrael” kon una fuerte minoridad palestinyana, komo es el kavzo en munchos payizes oksidentales kon otras etnias, minoridad ke de mas a mas se engrandesera kon el tyempo a la sigida de una prokreasyon de leshos muncho mas fertil ke la djudia, fakto ke kontyene el risko ke (en un futuro no muy leshano) la mayoria de la populasyon del Estado Israelyano sea de relijyon diferente de la orijinal .
Una grande kuantidad de sitizanos İsraelyanos son del mizmo avizo, por kontra ‘la Koalisyon Governomental’ esta divizada a este sujeto : Avigdor Lieberman prezidente del partido ‘Beitenu’ esta muy septiko por no dezir yelado konsernando la reaktivasyon de las negosyasyones. De otra parte, el ultra nasyonalisto Naftali Bennett prezidente de HaBayit HaYehudi es kategorikamente kontraryo a la kreasyon de un estado Palestinyano.
El Dyo ke meta su mano i mostre el kamino a segir.
b) Muevo homenaje a las viktimas de la Shoah:
70 anyos despues el trajiko epizodyo historiko ke fue la Shoah, el Muzeo Djudyo de Bruksel kijo renovelar su homenaje a la memorya de los 25.000 sitizanos djudyos de Beljika ke fueron arrestados i deportados entre 1942 i 1943 i avyo una mueva sala de ekspozisyon ke komporta unikamente dokumentos orijinales de arshivos, afishes, fotografias i objektos ke provyenen del kampo de konsentrasyon del payis .
‘La komemorasyon de las viktimas djudias del horrivle karnaje’ es para mozotros todos sovrevivyentes o ijos de sovrevivyentes, un dever sakro ke kada djudyo deve transmeter a las jenerasyones futuras afin ke nunka se pyedra en el olvido el rekuerdo de este drama ke kedara por syempre komo una mancha indelebile sovre la dinyidad de la humanidad.
Es ansi de los djudyos, kada uno kon su propya persepsyon del mundo i de las kozas, kada uno kon su opinyon personal i su objetivo a alkansar , raramente de akordo los unos kon los otros, ma nunka indiferentes los unos a los otros i syempre fuertemente unidos i solidaryos delantre kualkyer peligro.
