Si tenemos un aliado (dost) en la vida; kale ke mos syentemos mazalozos. El punto el mas sublimo (ulvi) de las relasyones de los umanos es la amistad (dostluk). La amistad es un kontakto (ilişki) limpido (duru), sano i valorozo, muy presyozo.
Kualo es la amistad? La relasyon ke se fonda kon el aliado. Ken es el aliado? Es la persona ke puedemos kedar desmudos allado de eya!...
El aliado es la persona ke puedemos avrir muestro korason, sin refujiyarmos (sığınmak) de detras de kualker koza. El aliado es; el ke esta allado de muestras ansyas, atagantos, verguensas, akontesimyentos i kulpas, i mira de topar solusyones para puedermos salvar de esta situasyon ande mos topamos. Puedemos kontar todos los sekretos a muestro aliado, todos los sentimyentos ke mos erguelen, ke mos azen gritar, ke mos eksitan.
Puedemos riyir u yorar komo keremos allado de el.
Ma no mos olvidaremos ke la amistad es de parte a parte, resiproko. Si estamos puedyendo komportarmos de la mizma manera kon el; la amistad akel tyempo es una amistad imortal.
Komo es muy difisil de fondar esta relasyon; es muy difisil de topar un aliado.
Este modo fue la boda de la ija de unos aliados, alhad ultimo, ke se puede dizir ke es muestra sovrina.
Unos aliados mas de ermanos, un dia muy spesyal para mi i toda mi famiya; la boda de Judith ija de Sara i Sami Galimidi kon İzi ijo de Meri i Albert de Venturero; ke se realizo en la sinagoga Neve-Shalom en Şişhane.
En primero el novyo kon su madre i padre, el kon su kara novle, pasaron a sus lugares en la teva.
Despues la madre de la novya muy elegante kon el ijo, akompanyados de un kortej bastante largo.
Delantre la novya 10 mansevas, todas vistidas una mijor de la otra, los fostanes kon los chapeyos apropriados, los kalsados kon el buketo de rozas en la mano, i a la fin la novya ke paresiya a un ancelo entera blanka kon el velo brodado i kon los ojikos bivos mirando a los envitados i kaminando apoko apoko.
Toda la paryentes, los amigos i konosidos los arisivyeron kon grande entuzyasmo. Fotos kon toda la famiya i la muzika divina (ilahi) ampeso.
El dezeo el mas grande de una madre i de un padre es kazar a los ijos en Neve-Shalom en esta sinagoga majestuoza kon las uzansas djudias.
La seremoniya fue ekstarordinarya.
El Dyo ke ayege a todos a echar tallet a sus ijas i ijos. Es un sentimyento muy espesyal ke se bive una u dos vezes en la vida.
Las felisitasyones tomaron muncho tyempo a kavza de la djente. A la fin las fotos kon todos endjuntos en la Teva. La nochada fue remarkable a kavza de la intimitad, sinseridad (içtenlik) i de la modestia.
Todos los envitados konosidos los unos kon los otros, avlando, riyendo i baylando kon grande entuzyasmo.
Los padres kon las madres muy elegantes, kon sus karas de riza i yena de kerensya, arisivyeron a toda la djente kon grande plazer. Aviya munchos mansevos i mansevas, amigos de la novya i el novyo.
El entuzyasmo i la egzaltasyon se estava vyendo de sus bayles i alegriya. Todos bevyendo muncho, se divertisyeron kon la muzika muy ermoza, ma muy alta para mozotros.
Todo es pasajero, lo mas emportante es ke seygan orozos fin a la fin de sus vidas kon muncho bueno.
A mi idea; la famiya es un konsepto sakra ke no se puede komparar kon nada. En la baza de este konsepto ay la amistad, el respekto, la kerensya i la piadad. Nada en el mundo, no kale ke dezazga esta unyon, esta solidaritad.
La famiya tyene un rolo emportante para desvelopar la kreativitad de su ijo u ija.
Kero terminar en dizyendo ke la famiya es; la valor la mas presyoza i la mas grande en la vida.
Mos kedaremos syempre kon la luz de la kerensya i de la amistad de muestras famiyas.
