Despues largas, muy largas refleksyones, la Fransya vyene enfin de deklarar ke bushkidas syentifikas pueden ser echas sovre embriones humanos a kondisyon ke eyos sean unikamente obtenidos in vitro, bushkidas ke permetran un estudyo mas aprofundido del potensyal jenetiko del puerpo humano.
Munchas personas la kritikaron de aver tanto tadrado a azerlo, kuando enfermedades komo el kanser, el sida i munchos otros males kontinuan a azer danyos irreparavles i kavzan la muerte munchas vezes inevitavle de miles i miles de ombres i mujeres en el mundo. Otras personas por kontra apresyan esta ezitasyon ke es el fruto de una grande refleksyon kuando se trata de kualkyer manipulasyon del genoma de un humano.
A notar ke un embrion no es egzaktamente una kriansa humana ma simplemente un monton de selulas sin kualkyer sistema nyervozo ni sensivilidad , i ke es solo despues de 8 semanas ke el devyene un ‘foetus’ el kual es realmente un ser humano.
Segun el rezultado de una chika bushkida ke ize, kaji todas las relijyones monoteistas interdizen ‘las manipulasyones syentifikas del genoma de una persona nasida komo tambyen a naser’. Todos savemos el rezilko ke kualkyer intervensyon puede komportar, i aktualmente en munchos payizes laikos afrankados de kualkyer preskripsyon relijyoza, egziste kaji syempre un “Sentro de Bio-Ethika” ke tyene komo misyon de baza ‘’el respekto i la salvaguardya absoluta de la integralidad del potensyal humano.’’
Para el ombre de syensya (kual sea el nivel de su honestedad profesyonal) la tentasyon es grande de saver lo mas posivle i de ir de mas i mas leshos en sus bushkidas.
Byen utilizadas, es seguro ke la mas parte de estas investigasyones ayegan presto o tadre a rezultados muy benefikos para la Humanidad i es ansi ke, desde los prinsipyos de los tyempos, se desvelopo la Syensya; ma mal utilizadas eyas pueden kavzar una desgradasyon de la kriansa humana.
No es solo en la biolojia, ma de mezmo en ke otro ramo syentifiko ke sea, dos kozas prevalen syempre: ‘la absoluta buena intisyon del syentifiko i tambyen la sertidumbre (en su konsyensya de kriansa pensante) ke sus investigasyones no avriran en el futuro la puerta a deskuvyertas malsanas i perikolozas. No mos olvidaremos los amargos regretos de Albert Einstein a la sigida de la fabrikasyon de la bomba atomika sovre baza de una de sus formulas.
Emile Zola tyene dicho un dia “Es ke la Syensya promete la felisidad? No lo kreo. Eya promete la Verdad. La kestyon es de saver si se puedra un dia krear realmente la felisidad kon la verdad?”
La repuesta al grande eskritor de la fin del dyezimueven siglo demanda muncha refleksyon. Es difisil de responder kategorikamente a la pregunta ke es en eya mizma muy ambivalente, portadora de dos realidades envezes kontraryas .
En el fondo, todo depende de las reales aspirasyones de la persona kargada del lavoro , i prinsipalmente si sus prinsipyos ethikos son mas fuertes ke su kuryozidad syentifika.
‘İr a delantre por el byen jeneral’ por seguro Sİ; ma komo lo dizen i repetan munchos pensadores “Nunka pedrer de vista ke la Ethika syentifika repoza esensyalmente sovre el respekto absoluto de la integralidad del potensyal humano en ke persona ke sea.
